Texte

Tannhäuser (Minnesänger)
Exportiert aus Wikisource am 6. September 2022
Tannhäuser
[[Bild:|220px]]
Tanhuser, Tanhûser, Tanhauser
* 1205 in
† ca. 1268 in
Minnesänger, Spruchdichter, Komponist
Artikel in der Wikipedia
Bilder und Medien bei Commons
Zitate bei Wikiquote
GND-Nummer 118620746
WP-Personensuche, SeeAlso, Deutsche Digitale Bibliothek
DNB: Datensatz, Werke
Werke
Texte
Uns kvmt ein wūneklichú zit (Codex Manesse, Blatt 264v)
Uns kvmt ein wunneklichú zit (Codex Manesse, Blatt 264v)
Went ir in ganzē froͤidē ſin (Codex Manesse, Blatt 265r)
Went ir in ganzen froͤiden sin (Codex Manesse, Blatt 265r)
Der wint̾ iſt zergāgē (Codex Manesse, Blatt 265r und 265v)
Der winter ist zergangen (Codex Manesse, Blatt 265r und 265v)
Ich lobe ein wib dú iſt noch beſſer dāne gůt (Codex Manesse, Blatt 265v und 266r)
Ich lobe ein wib dú ist noch besser danne gůt (Codex Manesse, Blatt 265v und 266r)
Der kv́nig vō marroch hat d̾ b̾ge noch genv̊g (Codex Manesse, Blatt 266r und 266v)
Der kv́nig von marroch hat der berge noch genv̊g (Codex Manesse, Blatt 266r und 266v)
Jch mv̊s clagē (Codex Manesse, Blatt 266v und 267r)
Ich mv̊s clagen (Codex Manesse, Blatt 266v und 267r)
Wol vf tanzen vb̾al (Codex Manesse, Blatt 267v)
Wol vf tanzen vberal (Codex Manesse, Blatt 267v)
Iarlang bloͤzet ſich d̾ walt (Codex Manesse, Blatt 267v)
Jarlang bloͤzet sich der walt (Codex Manesse, Blatt 267v)
Steter dieneſt d̾ iſt gv̊t (Codex Manesse, Blatt 267v)
Steter dienest der ist gv̊t (Codex Manesse, Blatt 267v)
Min frowe dú wil lonē mir (Codex Manesse, Blatt 267v und 268r)
Min frowe dú wil lonen mir (Codex Manesse, Blatt 267v und 268r)
Gegē diſen winnahtē (Codex Manesse, Blatt 268r)
Gegen disen winnahten (Codex Manesse, Blatt 268r)
Hie voꝛ do ſtv̊nt min ding alſo (Codex Manesse, Blatt 268r und 268v)
Hie vor do stv̊nt min ding also (Codex Manesse, Blatt 268r und 268v)
Wol im d̾ nv beiſſen ſol (Codex Manesse, Blatt 268v und 269r)
Wol im der nv beissen sol (Codex Manesse, Blatt 268v und 269r)
Dank habe d̾ meie (Codex Manesse, Blatt 269r und 269v)
Dank habe der meie (Codex Manesse, Blatt 269r und 269v)
Es ſlůg ein wib ir man zetode vn̄ al ir kint geſwinde (Codex Manesse, Blatt 269v)
Es slůg ein wib ir man zetode vnd al ir kint geswinde (Codex Manesse, Blatt 269v)
Editionen
Heidelberg, Universitätsbibliothek, Cpg 848, 264r bis 269v, Digitalisat UB Heidelberg bis UB Heidelberg
Ralf-Henning Steinmetz [u. a.] (Hrsg.): Die Dichtungen des Tannhäusers: Texte und Übersetzungen. Germanistisches Seminar, Kiel 2019 (vollständige Textausgabe, PDF, nach modernen Prinzipien ediert und mit textnahen Übersetzungen versehen).
Helmut Lomnitzer, Ulrich Müller (Hrsg.): Tannhäuser: die lyrischen Gedichte der Handschriften C und J; Abbildungen und Materialien zur gesamten Überlieferung der Texte und ihrer Wirkungsgeschichte und zu den Melodien (= Litterae. Band 13). Kümmerle, Göppingen 1973, ISBN 3-87452-111-7 (Abbildungen der handschriftlichen Texte und des Textes von Siebert).
Johannes Siebert: Der Dichter Tannhäuser: Leben, Gedichte, Sage. Niemeyer, Halle/Saale 1934. Nachdruck: Olms, Hildesheim 1980, ISBN 3-487-06832-X Google
Sekundärliteratur
Richard M. Meyer: Tannhäuser. In: Allgemeine Deutsche Biographie (ADB). Band 37. Duncker & Humblot, Leipzig 1894, S. 385–388
Wolfgang Rappel: Tannhäuser. In: Karl Bosl (Hrsg.): Bosls bayerische Biographie. Pustet, Regensburg 1983, ISBN 3-7917-0792-2, S. 770 (Digitalisat).
Rudolf Stöckl: Tannhäuser. In: Wolfgang Buhl (Hrsg.): Fränkische Klassiker. Nürnberg 1971, ISBN 3-920701-28-3, S. 96–109 (Gute Beschreibung von Leben und Dichtung des Minnesängers)
Dietz-Rüdiger Moser: Die Tannhäuser-Legende. Eine Studie über Intentionalität und Rezeption katechetischer Volkserzählungen zum Buß-Sakrament (= Fabula: Supplement-Serie, Reihe B. Untersuchungen; 4). de Gruyter, Berlin 1977, ISBN 3-11-005957-6 (Besprechung)
Burghart Wachinger: Tannhäuser. In: Verfasserlexikon. 2. Auflage. Band 9. de Gruyter, Berlin [u. a.] 1995, Sp. 600–610
Burghart Wachinger: Vom Tannhäuser zur Tannhäuser-Ballade. In: Zeitschrift für deutsches Altertum. 125, 1996, S. 125–141
Johann Schrenk: Tannhäusers Heimat (= Auf den Spuren der Dichter und Denker durch Franken. Band 1). Gunzenhausen 2003, ISBN 3-924270-38-4
Philip Stefan Barto: Tannhauser and the Mountain of Venus. A Study in the Legend of the Germanic Paradise. Kessinger Pub. Co. 2007. ISBN 978-0-548-09913-1
Ralf-Henning Steinmetz: Tannhäuser. In: Neue Deutsche Biographie (NDB). Band 25, Duncker & Humblot, Berlin 2013, ISBN 978-3-428-11206-7, S. 783 f. MDZ München
Horst Brunner, Johann Schrenk: Tannhäuser (Reihe Auf den Spuren der Dichter und Denker durch Franken). Schrenk, Gunzenhausen 2014, ISBN 978-3-924270-60-5
Bernhard M. Baron: Der Tannhäuser – ein Minnesänger aus der Oberpfalz. In: Oberpfälzer Heimatspiegel 2016, hrg. von Bezirksheimatpfleger Dr. Tobias Appl, Pressath 2015, ISBN 978-3-939247-66-1, S. 178–184
Weblinks
Tannhäuser im Bayerischen Musiker-Lexikon Online (BMLO)
Tannhäuser im Literaturportal Bayern (Projekt der Bayerischen Staatsbibliothek)
Der Tanhuser in der Bibliotheca Augustana
Tannhäuser in Gedächtnis des Landes zur Geschichte des Landes Niederösterreich (Museum Niederösterreich)
Über diese digitale Edition
Dieses E-Book wurde aus dem Bestand der freien Quellensammlung Wikisource, einem Schwesterprojekt der Wikipedia, erstellt. Dieses mehrsprachige Projekt, dient dem Aufbau einer Bibliothek mit frei verfügbaren Inhalten und wird ausschließlich von Freiwilligen betrieben. Wikisource umfasst eine Vielzahl von Texten: Romane, Gedichte, wissenschaftliche Aufsätze, Reportagen, Gesetze, Zeitungen und Zeitschriften und vieles mehr.
Alle Werke bei Wikisource sind entweder gemeinfrei oder stehen unter einer freien Lizenz. Sie können dieses E-Book für jeden Zweck, auch kommerzielle, verwenden und beliebig weitergeben. Im Falle, dass der Text unter einer freien Lizenz steht, sind zusätzlich die entsprechenden Lizenzbedingungen zu beachten.
Wikisource ist immer auf der Suche nach neuen Mitarbeitern. Wenn Sie Interesse an einer Mitarbeit haben, finden Sie einführenden Informationen auf der Hauptseite von Wikisource.
Bei der Erstellung des Textes kann es leider zu Fehlern kommen. Wenn Sie einen solchen finden, bitten wir um entsprechende Informationen auf dieser Wikisource-Seite oder per E-Mail an ebook@wikisource.de.
UNs kvmt ein wunneklichú zit·
des froͤit sich alles dc dir ist·
dú manigen hohgemvͤte git·
so wol dir meie dc dv bist·
so rehte wunnekliche komen·
dc ist mines herzen spil·
wir han dc alle wol vernomen·
wie der fúrste leben wil·
In oͤsterriche vnd anderswa·
wil er behalden ie den pris·
Beide hie dort vnd da·
ist er an allen dingen wis·
Er hat sin ding vollebraht also·
dc man den werden danken mv̊s·
Er mag wol iemer wesen fro·
swem er da bútet sinen grůs·
Mit eren richet er der helt·
von iar zeiare bc vnd bas·
In weis ob irs gelǒben welt·
er lat es niht durh smehen has·
Nach siner wirde in nieman gar geloben kan·
Swc er getůt wer getar sich des genemen an·
der habe ich noch bi minen tagen niht vil gesehen·
des hoͤrt man ime die wisen vnd die besten iehen·
Si slafent noch erweket si des dunket mih·
es wc ein spil gar vnz an her nv huͤten sich·
dc si den helt erzúrnen niht·
dc ist min rat es mag geschaden·
In weis ob sis gelǒbent iht·
si sint mit im gar vberladen·
vnd mv̊ssen alle wichen vor·
swa er vert hin mit siner schar·
er sweibet ob in hoh embor·
vil schone alsam ein adelar·
Sinen rate bin ich holt er lêret niht wan werdekeit·
sin widerratent niht sin ere· die sint vollekliche breit·
er hat vnd mag vnd getar getv̊n der stolze waleis vnv́zaget·
wer lebt von dem man nv so vil der wunderlichen dinge saget·
er hat niht wandels vmb ein har·
swas er geredet dc lat er war·
Mit im so varnt ivden| cristen| kriechen| valwen heiden vil·
vnger púlan| rússen| behein swer eht schone leben wil·
Der ist behalden swannen er vert bi im ist er ein fromer man·
Manigen armen er beratet ich hebe an mir selbem an·
da bi schaffet er den besten vride vber ellú sinú lant·
gv̊ten kǒf vmbe alles ding er wendet rǒb vnd brant·
Sin herze blv̊t alsam ein bǒn·
der zallen ziten froͤide birt·
Ir aller milte ist gar ein trǒn·
wider im er ist der eren wirt·
Min gelǒbe ist dc swer in zer wochen eines mag gesehen·
dc dem vngelúkes niht enkeiner slahte mag geschehen·
er mag wol heissen friderich·
es wirt aber niemer sin gelich·
In kurzen ziten dc geschiht·
dc man wol eine krone·
schone vf sinem hǒbte siht·
so vert der fúrste schone·
er ist vnser wunne·
glanz alsam dú svnne·
so ist sin tvgenthafter lib
milt vnd erebere·
ellú wol getanen wib·
fragent von im mere·
von dem guten·
wol gemv̊ten·
vragent si vil dike bi dem rine·
Allenthalben·
vf dien alben·
lopt man in wol vnd die sine·
Vf dem wasser vnd dem plane ist er so vermessen·
in weis niht des an dem degen iender si vergessen·
Trurig herze fro·
wirt von im swanne er singet dien frowen den reigen·
So hilfe ich im so·
dc ich singe mit im zaller zit gerne den meien·
Sin schimpf der ist gůt·
wan er git·
zaller zit·
mit eren der reine·
Da bi hoh gemv̊t·
offenbar-
lich getar·
sin gůt dc ist gemeine·
er ist zallen ziten fro·
im zimt wol dc lachen·
dc kan er vil sv̊sse also
wol mit froͤiden machen·
Vest alsam ein adamant·
swa mans sol beherten·
Sin lop vert dur ellú lant·
dc kan nieman scherten·
Lobe in ieman bc danne ich·
der sol des geniessen·
Alle singer dvnket mich·
mvͤste sin verdriessen·
Nv dar·
dú schar·
wirt aber michel· komen wir zesamne in der gasse von dien strassen·
Nv dan·
ich kan·
noch wunder machen· des ich niht wil lassen·
Mit mir·
svlt ir·
komen vf den anger· da man die ivngen mit scharen siht zů sigen·
Da sint·
dú kint·
vor dien man mv̊s beide floͤtten vnd gigen·
wa ist nv dú gůte·
mit ir pfawen hůte·
der vergisse ich niemer·
solde ich leben iemer·
bi der linden·
sol man vinden·
vns bi schonen kinden·
da svln wir singen·
vnd springen·
da sol vns gelingen·
la wa· lat si sich vinden·
sa· da· bi den schonen kinden·
da sol nieman sin vnfro·
da der tanhusere·
Reiget mit der lieben so·
dc were im ein swere·
were da niht fro kúnigvnt·
mit ir reiden loͤken·
dú treit einen roten mv̄t·
dc sint svmertoͤken·
da wirt mazzee
mir ze drazze·
lǒfet si mir vor mit dem balle·
Gvͤtel gvͤtel·
mache ein mvͤtel·
dc es mir vnd dir wol gevalle·
vf vf kint pruͤuet dc leben·
sit vns got den lib hat gegeben·
So svln wir singen·
froͤliche springen·
WEnt ir in ganzen froͤiden sin·
so wil ich ú tv̊n helfe schin·
vnd sit ir fro so froͤwe ich mich·
sit wir den svmer han gesehen·
Dú heide stat gar wunneklich·
des mv̊s man ir von schulden iehen·
dur kurzewile ich kan gegan·
vf eine gruͤne heide breit·
dc wc so wunneklich der plan·
dc mir swant min herzeleit·
da hort ich die vogel froͤwen·
sich der wunneklichen zit·
dc kan veron den svͤssen doͤwen·
dc si svngen widerstrit·
Ich hort da vil manigen don·
von den kleinen vogellin·
Dú heide gab in senften lon·
mit manigerhande blůmen schin·
der selben blůmen brach ich vil·
al da ichs vf der heide sach·
Es duhte mich ein senftes spil·
ein aventúre mir geschach·
Da von min herze in froͤiden was·
vnd iemer mv̊s in froͤiden sin·
Ich sach durh dc gruͤne gras·
gan ein vil schones megetin·
Min herze dc wart froͤidenrich·
do ich die schonen erest sach·
Si duhte mich so minnenklich·
dc ich mich ir fúr eigen iach·
vnd ich ir also nahe kan·
dc ich ir bot den minen grůs·
vnd si min rehte war genan·
do wart mir aller sorgen bůs·
Ahý wie dú vil liebe erschrac·
do min dú schone wart gewar·
Da wc so wunneklich der tag·
Si trůg ein schapel rosevar·
Schoner creatúre ich nie
gesach so rehte wol gestalt·
Da si vf der heide gie·
bi ir so wurde ich niemer alt·
Ich sprach der minneklichen zv̊·
wie sit sus eine komen ir·
Her an disem morgen frů·
si sprach ir svlt gelǒben mir·
Dur senften luft ich in dem tǒwe
her nah rosen blůmen gie·
Ich sprach minnekliche frowe
din genade sv̊che ich hie·
An si bewande ich min gemvͤte·
vnd darzů mis herzen sin·
Frowe dur din selber gvͤte·
nim min herze mit dir hin·
dc enpfa mit dinem lone·
du bist aller tvgenden vol·
Frowe mines herzen krone·
so dc geschiht so tůst dv wol·
Da wir sament in den kle·
traten vns wc sanfte we·
Die schonen drvhte ich her zemir·
si glei dc es vil lute erhal·
Ir roten mvnt den kvste ich ir·
si sprach ir bringent mich in schal·
Alsus wart ich ir redegeselle·
ich nam si bi der wissen hant·
von vns wart ein gůt gevelle·
mir wart herze liebe erkant·
Nieman kan gepruͤuen niht
was steter froͤide bi vns was·
Wan dem soliches heil geschiht·
der sol gelǒben deste bas·
der nie herzeleit gewan·
der ge mit froͤiden disen tanz·
ob im sin herze von minne enbran·
der sol von rosen einen kranz·
Tragen der git hoh gemvͤte·
ob sin herze froͤide gert·
vnd gedenke an frowen guͤte·
so wirt er vil wol gewert·
Si git froͤide michels me·
danne des vil lieben meien blůt·
al die blv̊men vnd kle·
ir svͤsser name der ist so gůt·
Dc hab ich vil wol befvnden·
an der lieben frowen min·
wol der minneklichen stunden·
dc ich sach ir ǒgen schin·
vnd ich in ir minnebanden
also sere gestriket wart·
Mit armen vnd mit wîssen handen·
wol der minnenklichen vart·
da ist si gerivelieret·
gruͤne heide
Mit cleinen velden wol gezieret·
an ir stat aller min gedank·
Dem tanze svln wir vrlob geben
wan er schiere ein ende hat·
vnd svln in hohem mv̊te leben·
megede ir hant es minen rat·
valsches truren werfent hin·
mit zúhten sult ir wesen fro·
Gewinnen wir der selben sin·
so svlen wir mit in tůn also·
Der winter ist zergangen·
dc prvͤfe ich vf der heide·
Al dar kan ich gegangen·
gůt wart min ǒgenweide·
Uon den blůmen wol getan·
wer sach ie so schonen plan·
Der brach ich zeinem kranze·
den truͤg ich mit zhoie zv̊ den frowen an dem tanze·
Welle ieman werden hohgemv̊t· der hebe sich vf die schanze·
Da stat viol vnd kle·
svmerlatten camandre·
die werden zitelosen·
oster cloien vant ich da· die lilien vnd die rosen·
Do wunsche ich das ich sant min frowen solte kosen·
Si gab mir an ir den pris·
dc ich were ir dulz amis·
mit dienste disen meien·
dur si so wil ich reigen·
Ein fores stůnt da nahen·
al dar begvnde ich gahen·
da horte ich mich enpfahen·
die vogel also sv̊sse·
so wol dem selben grůsse·
Ich horte da wol zhantieren·
die nahtegal tǒbieren·
al da mv̊ste ich parlieren·
zerehte wie mir were·
ich was ane alle swere·
Ein rifiere ich da gesach·
dvrh den fores gieng ein bach·
zetal vber ein planúre·
ich sleich ir nach vnz ich si vant· die schone creatúre·
bi dem fontane sas dú clare dv́ [265v] suͤse von fanúre·
Ir ǒgen lieht vnd wol gestalt·
si was an sprúchen niht zebalt·
wan mehte si wol liden·
Ir mvnt ist rot ir kele ist blank·
ir har reit val zemâsse lank·
gevar alsam die siden·
Solde ich vor ir ligen tot· in mehte ir niht vermiden·
Blank alsam ein hermelin·
waren ir dú ermelin·
ir persone dv́ wc smal·
wol geschaffen vber al·
ein lúzel grande wc si da·
wol geschaffen anderswa·
an ir ist niht vergessen·
lindú diehel slehtú bein· ir fuͤsse wol gemessen·
Schoner forme ich nie gesach· dú min cor hat besessen·
An ir ist ellú volle·
do ich die werden erest sach do hůb sich min parolle·
Ich wart fro·
vnd sprach do·
frowe min·
ich bin din·
dv bist min·
der strit der mvͤsse iemer sin·
dv bist mir vor in allen·
iemer an dem herzen min·
mv̊st dv mir wol gevallen·
Swa man frowen prvͤuen sol· da mv̊s ich vúr dich schallen·
an húbsch vnd ǒch an guͤte·
dv gist aller contrate mir zhoie ein hohgemvͤte·
Ich sprach der minneklchen zů·
got vnd anders nieman tů·
der dich behuͤten mvͤsse·
ir parol der was svͤsse·
Sa neic ich der schonen do·
ich wart an minem libe vro·
da von ich ir saluieren·
si bat mich ir zhantieren·
von der linden esten·
vnd von des meigen glesten·
da dú tauelrvnde wc·
da wir do schone waren·
dc wc lǒp dar vnder gras
si kvnde wol gebaren·
Da wc niht mâssenie me·
wan wir zwei dort in einem kle·
si leiste dc si da solde·
vnd tet dc ich da wolde·
Ich tet ir vil sanfte we·
Ich wúnsche dc es noch erge·
Ir zimt wol dc lachen·
do begv̄den wir beide· do ein gemellichens machen·
das geschach von liebe vnd ǒch von wunderlichen sachen·
von amv́re seit ich ir·
dc vergalt si dulze mir·
si iach si litte es gerne· dc ich ir tete als man den frowen tůt dort in palerne·
dc da geschach da denke ich an·
si wart min trut vnd ich ir man·
wol mich der aventúre·
erst iemer selig der si siht·
sit dc man ir des besten giht·
sist also gehúre·
ellú granze da geschach· von vns vf der planúre·
Ist iemen den gelinge bc·
dc lâsse ich ane has·
Si wc so hohes mv̊tes
dc ich vergas der sinne·
got lone ir alles gv̊tes·
so twinget mich ir minne·
wc ist dc si mir tůt·
allel gůt·
hohen mv̊t·
habe ich von ir iemer·
in vergisse ir niemer·
Wol vf adelheit·
dv solt sant mir sin gemeit·
wol vf wol vf irmengart·
dv mv̊st aber an die vart·
dú da niht enspringet dú treit ein kint·
sich froͤiwent algemeine die dir sint·
dort hoͤre ich die floͤiten wegen·
hie hoͤre ich den svmber regen·
Der vns helfe singen·
disen reigen springen·
dem mvͤsse wol gelingen·
zallen sinen dingen·
Wa sint nv die ivngen kint·
dc si bi vns niht ensint·
Sor ie so· selig si min kúnigvnt·
solt ich si kússen tusent stunt·
an ir vil rose varwen mvnt·
so were ich iemer me gesvnt·
dú mir dc herze hat verwunt·
vaste vnz vf der minne grv̄t·
Der ist enzwei·
Heia nv hei·
des fidelleres seite der ist enzwei·
ICh lobe ein wib dú ist noch besser danne gůt·
sist schone vnd ist schoner vil vnd hohgemv̊t·
si hat vor allen valschen dingen sich behv̊t·
Ich gehorte nie wib so wol geloben als man si tůt·
Ýsalde wart so schoͤne nie·
noch trone dú ein gúttin wc·
Medea swc dú noch ie begie·
des half ir mit wisheit fro pallas·
Juno gab richeit dur die minne hoͤre ich iehen·
swc dv́do hatte dc wart geteilet vberal·
Latricia dú lie sich tǒgenlichen sehen·
Palatrica den frowen vil der kinde stal·
Helena wc eins kv́niges wib·
zů der kam ein discordia·
Dc gieng in ǒch beiden an den lib·
des engalt ǒch amarodia·
Es schv̊f ein wib dc troia wart
zerstoͤret· dú hies avenant·
Lunet dú wc von hoher art·
ir vatter der hies willebrant·
Venvs ein apfel wart gegeben·
da von so hůb sich michel not·
dar vmbe gab paris sin leben·
da lag ǒch menalavs tot·
Sibille wc ein vil listig wib·
bi der amabilia·
Si rieten vf senatoren lip·
dc tet dú leide innuidia·
Fro planzhiflúr dv́ was allen dingen klůk·
dar vmbe walheis sit vil lange wart vertriben·
Cawan der den anker werdekliche trůc·
der klegte dc ýwin in dem fores wc beliben·
Sarmena klegte grôs vngemach·
dc Camv́ret als mvͤssig sas·
ze Cvraze si do mit zorne sprach·
da lanzlet sich des vermas·
dc er mich reche an parcifale·
der hectore sin veste brach·
Er nam [266r] zekaridol den gral·
da des achilles niht enrach·
so richet es mir galogriant·
Swas opris mir zeleide tůt·
týspe was elýon bekant·
gegen piramus stůnt ir mv̊t·
Dú clare amýe sprach zir massenie so·
Min gvmpenie· sol der stoͤrie wesen vro·
Ginofer vs britanie lant·
die artus hat ze wibe erkorn·
die man in hoher zhoie ie vant·
der brahte vs prouenzal ein horn·
von portigal ein pezhelier· dc wc so wunderlicher art·
swer dar vs trank der wandel hete dc er da mit begossen wart·
Porhtram dú was von lunders so geborn her·
das schůf der wigol gegen den prouenzal ein sper·
her wigamv́r da vor Camvoleis
wol tet ers als wirs han vernomen·
gegen dem so hielt her wigoleis·
der was den vrowen zedienste komen·
Tristran erwark die kúnigin
von Marroch als wir hoͤren sagen·
Ein moͤrin wc dú heidenin·
der alden svln wir hie gedagen·
vnd loben min gv̊ten·
Die reinen wol gemv̊ten·
Swa si gat an dem tanze·
swa si gat an den tannze·
mit ir rôsen kranze·
dar obe ein ander krenzel·
ein wis gevalden swenzel·
Ir har gelich dem golde·
Als es got wúnschen solde·
Chrus alsam die siden·
wan mehte si wol liden·
Swa minne wer genême·
dú liebe da wol zeme·
von orient
vnz ze occident·
wart nie schoner wib geborn·
Ich han die gv̊ten·
wol gemv̊ten·
iemer mere zetroste erkorn·
Ir mv̄t gewelwet·
niht geselwet·
ist ir wengel vnd kel·
ob ich iehe·
das ich sehe·
da ir lib ist sinewel·
des ensol ich melden· seht dc zeme niht·
wan der si mit minen ǒgen ane siht
dem mv̊s si wol gevallen·
zewunsche vor in allen·
Ich lobe ir zuht ir gvͤte·
ir stete ir hohgemvͤte·
ir lib der ist so wol gestalt·
swer bi ir solde werden alt·
der hat der werlte lob vil gar·
si ist so minneklich gevar·
an ir ist niht vergessen·
zewunsche ist si gemessen·
vf ir húfel vberal·
da sol ein borte ligen smal·
vil wol gesenket hin zetal·
da man ir reiet an den sal·
da ist lib gedrollen·
zewunsche wol die vollen·
volge mir
sam tv̊n ich dir·
herzeliebú reine· du gv̊te dú svͤsse·
tv̊st dv́ dc·
so wirt mir bas·
dc dich got vristen mvͤsse·
Minne mich
sam tv̊n ich dich·
sol ich iemer helfe alde froͤide gewinnen·
frôwe min
dc mvͤste sin·
vil gar von dinen minnen·
wol gemv̊ten·
lânt die gv̊ten·
iv behagen·
Si sol von rehter arte der eren krone tragen·
Swa si gat zv̊ der linden·
mit wol gemv̊ten kinden·
da zimt ir wol dc reigen·
si zieret wol den meigen·
Ir zimt wol dc lachen·
dc kan si sv̊sse machen·
si machet trurig herze fro balt·
si ivnget den der ê· wc alt·
Lopt ieman sine frowen bas·
dc lasse ich iemer svnder has·
Nv heia tanhvsere·
zergangen ist din swere·
Swa dú liebe bi dir were·
dú ist so froͤidebere·
Da wurde wol gesvngen·
getanzet vnd gesprvngen·
Nv dar·
nement war·
wa dú liebe springet·
vor mir·
nach mir·
swie der seite erklinget·
gestriket wol zeprise·
ze bliken also lise·
wa ist min fro mazze·
der springe ich zetrazze·
Nv seht an ir fuͤsse·
die machent es so svͤsse·
seht an ir beinel
reit brvn ist ir meinel·
wa ist min fro ivzze· dú liebe also lange·
dc elle an dem tanze·
niht springet gedrange·
Nv wol vf zerlinden· ir kint also ivngen·
da wirt vnder kranze
zetanze gesvngen·
heia svmer wunne·
swer vns din erbvnne·
hie nimt der tanz ein ende·
swer vns die froͤide wende·
den vermiden rosen·
vnd alle zitelosen·
vnd aller vogellinen sang·
mich twinget dc mich e da twang·
Nv singe ich aber hei·
heia nv heý·
Nv ist dem videllere sin videlboge enzwei·
Der kv́nig von marroch hat der berge noch genv̊g·
die guldin sint zegǒcasals des hoͤre ich iehen·
Swie rich er si min wille mich nie dar getrůg·
Ich han ǒch den von barbarie wol gesehen·
von dem von persýan hoͤre ich wunder sagen·
so hat noch mer gewaltes der von indýan·
Den kúnig von latrize hoͤre ich vil der heiden klagen·
sam taten si dem soldan von der sitrican·
Ich kenne ǒch wol den pýlat da von zasamang·
ze babilonie iehent si wie gv̊t der si·
ze alexandrie so enhabe ich dekeinen gedank·
der kv́nig von baldag sol min iemer wesen fri·
von kúnig cornetin habe ich vil vernomen·
vúr thomas gat der iordan dc ist mir bekant·
ze irusalem zem cornetal bin ich komen·
Encolie ist mir wol kvnt [266v] in kiperlant·
in normanýa ich wc·
wie kvme ich da genas·
Fúr anthioch kam ich ze túrgis svnder danc·
Da was der taten vil·
von den ich singen wil·
der vattan gar mit siner milte kriechen twang·
von salnegge ein Roýs·
der was von mvnt fortdýs·
Ze constantinopel was ein grande merfeýn·
Dú wite troie lang·
dú wart gar an ir dank
zerstoͤret· da mvͤse sit dú rumanýe sin·
ze kúnis erbent och dú wib vnd niht die man·
dar an so stôsset pulgerie hoͤre ich sagen·
die valwen sint gar vngeriht in tanagran·
des horte ich vil die ungern vnd die Rivsen klagen·
Der behein solde wol dem richen hellen mitte·
Cecilie sol dem keiser wesen vndertan·
Die sarden hant ǒch manigen wunderlichen sitte·
den voget von rome ich dike wol gesehen·
kerlingen stat mit gv̊tem vride vnd da bi engellant·
die zarle wolden iemer also wesen fri·
Dur artus wart britanie zekaridol genant·
die wilzen sint geborn da her von tenebrie·
Fúnf sterkú regna sint·
er ist vil gar ein kint·
swer der niht weis in spangen· vnd sint doch wissentlich·
Das eine ist portigal
vnd hat dú richú tal·
ander ist kaliz vnd ist vnmâssen rich·
Der dritte hat genv̊g· vnd ist von arragvn·
Der vierde vert vúr kasteln hin· gegen gramýzvn·
Den fúnften von nauarre· swer den welle sehen·
der var da hin so mv̊s er mir der warheit iehen·
Terramer der fůrte ein her· zeorense mit gewalde·
dc wc dien schampvneisen leit· si verlurn da ivnge vnd alde·
storie manigvalde·
Oravil schv̊f sich grôsse not
den burgen do zeleide·
da lag vil manig waleis tot
ze turnis vf der heide·
dc schv̊fen si do beide·
vienne hat legisten vl·
der kunst astronomie·
ze doleth ich niht lernen wil·
von der nigromancie·
niht gv̊t ist zǒberie·
ýbernia hat der schotten vil an ir gelǒben stete·
zeNorwege bedarf man wol vúr kelte gv̊ter wete·
so hat ǒch der tennemark· der yseln vil besessen·
so mag ich des von oͤsterriche zegv̊te niht vergessen·
der wc ein helt vermessen·
bi dem wc ich gesessen·
Der vs peierlant mag sich ze kúnigen wol gelichen·
ich gesach nie fúrsten me so milten noch so richen·
so rehte lobelichen·
heia tanhusere nv la dich iemer bi im vinden·
gar an allen wandel din· so liebest dich den kinden
vnd mag din leit verswinden·
Nime den rosen kranz·
trage in der gv̊ten an den tanz·
vnd strike in wol zeprise·
la din truren sin·
nim war der lieben frowen din·
si tanzet also lise·
viuianz ist clar·
Gvnrvn nimt sin besser war·
noch bas danne echelabvre·
belamvr si hat·
swanne si die zerlat·
so froͤit ich min parlure·
Salatin der twanc mit siner milten hant ein wunder·
sam tet der kv́nig ermenrich dc lant zebelagvnder·
es wart nie bas gestalt· danne ich die minnekliche vant alleine·
Mache fro mich selig wib· la tanzen mich an diner hant vil reine·
ich von růlande vil· dc tet ich aber nach wane·
nv lâssen wir die reken sin· vnd alle die von trane·
vnd die von bridamanne·
Ein schampenie wc da bi·
ein foret stůnt da nahen·
da was manig belamýe·
die dar begvnden gahen·
do si min lieb ersahen·
wol vf min gůte
zv̊ mir an den reigen·
mir ist zemv̊te·
wir mvͤssen vnsich zweigen·
nach der vil lieben der claren der svͤssen·
dú miner swere ein teil kan gebvͤssen·
wa nv Jvte vnd lose·
hie gat metze vnd rose·
wa nv richi vnd tvͤtel·
hie get bele vnd gvͤtel·
Schone mit dem kranze·
slichet an dem tanze·
wart nie bas gestalt ein lip·
nv la dich minnen selig wib·
werdú creatv́ren
palúre·
Ir mv̄t bran als ein rubin· gegen der svnnen glaste·
ir kel ein adamaste·
der tvgende vol ein kaste·
wa nv floͤter herpfer dar zv̊ tambvrere·
gegen der gv̊ten
wol gemv̊ten·
dú ist so froͤidebere·
wa sint nv trumbvnere·
Nv svnge ich vil mere·
nv fúrhte ich vil sere·
dc sin die verdriesse swen ich gerne lere·
Nv ist dem videllere sin seite zerbrochen·
dc selbe geschiht im alle die wochen·
Heia tanhvsere·
la dir niht wesen swere·
swa man nv singe·
froͤliche springe·
heia nv hei·
ICh mv̊s clagen·
dc bi kurzen tagen·
dv́ werlt wil an froͤiden gar verzagen·
dú ist so kranc·
swc ich ir ie gesang·
zedienste des seit si mir kleinen dank·
ein ander not·
glage ich svnder spot·
dc rehtú milte ist an den herren tot·
also zel zemersten an
den keisˢ friderichen·
owe dc man niht vinden kan·
in allen tútschen richen·
ein [267r] kúnik dem zeme wol
nach im des riches crone·
owe dc er niht leben sol·
dem si stůnt also schone·
dc was der milte kúnig heinrich
bi dem wc fride stête·
dc nieman tůt dem gelich
der zv̊ dem riche trete·
vnd im mit truwen were bi·
nv ist der kúnig erstorben·
vnd ist dc rich gar erbes vri·
dc bi ist vil verdorben·
des besten landes ein michel teil
die wile vnd dc er lebt
kúnig kv̊nrat· da wc maniger geil
der nach den riche strebet·
nv ist aller schar gelegen·
wa siht man noch erglesten·
als man bi kúnigen hat gepflegen·
den kvnden vnd den gesten·
vs beheim lande ein kúnig rich·
vnd ǒch in osterlande
ein lúpolt vnd ein friderich·
die lepten âne schande·
Ein ivnger fúrste von miran·
vnd ǒch ein welf von swaben·
die willeklichen manigem man
vil richer kleider gaben·
ein ivnger helt von abenberg·
vnd hug ein twingere [WS 1]
die worhten beide herren werg·
si bv̊sten manigem swere·
Ein herman vs dúringen lant
dar zv̊ ein brabandere·
Chv̊nrat von lantsperg genant·
dar zv̊ der bogener
des milte was· mir wol erkant·
wer erbet nv ir milte
erich [WS 2] vs denne machen lant
den gabe nie bevilte·
des tvgende wankte niht ein har·
si ist iemer stete· trúwe
da bi nim ich eines herren war·
der hat so ganze trúwe
von brennen ein grave dietrich
der hat tvgende ein wunder·
vil milter got von himelriche
gewer mich des besvnder
an sime svne Chv̊nrat genant·
die wile in treit dú erde·
so wúnsche ich des dvr ellú lant·
dc er gůt rihter werde·
vnd er begrife des vatter spor
nach rechtes herren lere·
die wile im gat dú ivgende vor·
so hat sin alter ere·
also der ivngen fúrste wert
der selbe vs dúringen lande
albrecht vil riches lob vf gat
gebrůder âne schande·
vs bolon lande ein fúrste wert
des wil ich niht vergessen·
vro ere sin zallen zite gert·
dú hat in wol besessen·
herzogen heinrich eren rich·
von pressela genant ·
den wil ich loben sicherlich·
min zvnge in wol erkennet·
het er tvsent fúrsten gůt·
seit man in tútschem richen·
dc vergebe sin milter mv̊t·
vnd tet es willecliche·
fride vnd reht ist vs gesant·
von ime vf sine strâsse·
der ivnge kúnig vs beheim lant·
der lebt in kúniges mâsse·
wer gesach bi manigen ziten ie
so werdes fúrsten krone
als er in behein lande trůg·
dem si stuͤnde also schone·
got helf der sele vs grôsser not·
ich meine die herren alle
die sin an rehter milte tot·
vnd ǒch mit eren schalle·
got setzes alle in sine schar·
ich wil von fúrsten singen·
der vinde ich leider cleinen gar·
die nv nach lobe ringen·
an dem man ie des besten iach
heinrich der mizenere·
der sine trúwe nie zerbrach·
der ist alles wandels lere·
er solte des riches krone tragen·
der vatter mit den kinden·
Ich kvnde nie bi minen tagen·
kein wandel an im vinden·
an hennenberg vil eren lit·
mit tvgenden wol beschoͤnet·
graue herman ǒwe der zit
dc der niht wart gekroͤnet·
des mv̊s ich in von schulden klagen·
got gebe im dort zelône·
nach siner wirde mvͤze er tragen·
in himelrich die crone·
vs saxen lant herzoge albreht [WS 3]
der wc der fúrsten lere·
er kvnde vns fride wol machen sleht·
dú werlt hat sin ere·
von babenberg bischof egebreht·
den wil ich gerne gruͤssen·
er was an allen tvgenden reht·
er kvnde wol kvmber buͤssen·
vs peier lant ein fúrfte wert
den gruͤsse ich mit gesange·
sin herze manger eren gert·
des milte mv̊s mich belangen·
sin brv̊der heisset lvdewig·
der hat der tvgenden ein wunder·
Den fúrsten da von brvnenswig·
behůte vns got besvnder·
von brandenbvrg der hof stet wol·
dem ist also zemv̊te·
dc sú sint wisheit also vol·
dú wisheit stet nach gvote·
wa sol ich herren sv̊chen·
die lobes nv gerůchen·
die sol vro ere wisen·
swer rehtes lob kan prisen·
mit werdes fúrsten zvngen·
dem wirdet lob gesvngen·
ich wil den fúrsten nennen·
ob ir in welt erkennen·
Sin grůs vnd ǒch sin lachen·
dc kan mir froͤide machen·
des mvnt ist kúsche vnd svͤsse wort·
dc fuͤget nieman bc danne reinen wiben·
sit ir gvͤte hilfet mangem senden man
der in ir minne banden lit·
Anmerkungen (Wikisource)
↑ Vorlage: twinger.
↑ Vorlage: ere ich.
↑ Vorlage: albeht.
Wol vf tanzen vberal·
froͤit úch stolzen leigen·
wunneklichen stat der walt·
wol gelǒbet dc sint liebú mere·
iarlang pruͤuet sich der schal·
gegen dem liehten meigen·
da die vogel vberal
singent wol zergangen ist ir swere·
alle vber ein planúre·
die blv̊men sint entsprvngen·
elliv creatúre
dú mv̊sse da von ivngen·
wil ein wib so wirt mir wol nach der ie min herze hat gerungen·
Zergangen ist der leide sne·
von der gruͤnen heide·
komen sint vns die blv̊men rot·
des froͤit sich dú werlt ellú gemeine·
dar zv̊ viol vnd kle·
liehte ǒgen weide·
mt den wunnen ist mir we·
dc kan nieman wenden wan alleine·
dú mich heisset singen·
der zimt wol dc lachen·
sol mir wol gelingen·
dc mv̊s ir gvͤte machen·
von ir schulden mv̊ssen noch tusent herzen vnd dannoch mere erkrachen·
Dú mir an dem herzen lit·
die sach ich so schone·
an einem tanze da si gie·
wol mit eren bi den schonen frowen·
ich wart fro der selben zit·
got ir iemer lone·
dc si mich so wol enpfie·
solde ich si noch einest also schowen·
die vil tvgentrichen·
so were mir wol zemv̊te·
ir kan niht gelichen·
vil selig si dv́ gv̊te·
nach ir minnen ist mir we· noch ist dú werlt gar vngemeiner hůte·
Jarlang bloͤzet sich der walt·
vnd ǒch dú heide·
valwet von dem kalden sne·
wie hant sich div zit gestalt
owe der leide·
schowent wie der anger ste·
zergangen ist der gruͤne kle·
wil dú reine
die ich da meine·
min vergessen so wirt mir vil dike we·
Min frúnde helfent mir·
der lieben danken·
der ich singen vf hohen pris
gůten trost han ich von ir·
mehte ich der blanken·
machen brvn ir roten gris·
si gert des apfels den [WS 1] paris·
gab dur minne
der gúttinne·
fuͤge ich dc so mag ich heissen ir amis·
Swas ich wil dc ist ir nein·
mv̊s ich dc liden·
ê· wie lange sol dc wern [WS 2]·
alsvs hellen wir enein·
koͤnde ich gemiden·
si dc wolde ich fuͤgen gern [WS 3]·
si wil von mir den liehten stern [WS 4]
tremvntanen·
vnd den manen·
zv̊ der svnne· des en wil si niht enbern·
Anmerkungen (Wikisource)
↑ Vorlage: vō.
↑ Vorlage: w̾en.
↑ Vorlage: g̾ne.
↑ Vorlage: ſt̾nē.
Steter dienest der ist gv̊t·
den man schonen frowen tůt·
als ich miner han getan·
der mv̊s ich den salamander bringen·
eines hat si mir gebotten·
dc ich schike ir abe den rotten·
hin provenz in das lant
zenv̊renberg· so mag mir wol gelingen·
vnd die tv̊nǒwe vber rin
fuͤge ich das so tv̊t si swes ich mv̊te·
spriche ich ia si sprichet nein·
svs so hellen wir en ein·
dank so habe dv́ frowen min
sist geheissen gv̊te·
heia hei sist ze lange gewesen vs miner hv̊te·
la húte vnd iemer mere ia·
heilalle vnd aber ia·
ziehent herze wafena·
wie tůt mir dú liebe so·
dv́ reine vnd dv́ vil gv̊te·
dc si mich niht machet fro·
des ist mir we ze mv̊te·
Mich froͤit noch bas ein lieber wan·
den ich von der schonen han·
so der mv́seberg zerge
sam der sne· so lonet mir dú reine·
alles des min herze gert·
des bin ich an ir gewert·
minen willen tůt si gar·
buwe ich ir ein hus von helfenbeine
swa si wil vf einen se·
so habe ich ir hulde frúntschaft vnd ir hulde·
bringe ich ir von galýle [WS 1]
her an alle schulde·
einen berk gefuͤge ich dc·
da her adan vffe sas·
heia hei dc were aller dienste ein vber gulde·
Ja húte vnd iemer ia·
heilalle vnd aber ia·
ziehent herze wafena·
wie tůt mir dú liebe so·
dv́ reine vnd dv́ vil gv̊te·
dc si mich niht machet fro·
des ist mir we ze mv̊te· [WS 2]
Ein bǒn stan in ýndian·
gros den wil si von mir han·
minen wille tůt si gar
seht ob ich irs alles her gewinne·
ich mv̊s gewinnen ir den gral·
des da pflag her parcýfal·
vnd den apfel den paris
gab dvr minne venvs der gúttine·
vnd den mantel der besloss
gar die frowen dú ist vnwandelben·
dannoch wil si wunder gros·
dc ist mir worden swere·
ir ist nach der arke we·
dú beslossen hat noe·
heia hei·
brehte ich die wie lieb ich danne were·
Ja húte vnd iemer ia·
heilalle vnd aber ia·
ziehent herze wafena·
wie tůt mir dú liebe so·
dv́ reine vnd dv́ vil gv̊te·
dc si mich niht machet fro·
des ist mir we ze mv̊te· [WS 3]
Anmerkungen (Wikisource)
↑ Vorlage: galýlee.
↑ Vorlage: Ja húte vn̄ iem̾ ia·
↑ Vorlage: Ja húte vn̄ iem̾ ia·
Min frowe dú wil lonen mir·
der ich so vil gedienet han·
des svlt ir alle danken ir·
si hat so wol zemir getan·
si wil dc ich ir wende den rin·
dc er fúr kobelenze iht ge·
so wil si tv̊n den willen min·
mag ir bringen von dem se·
des grienes da dv́ sv̄ne vf get·
zereste so wil si mich wern·
ein sterne da bi nahe stet·
des wil si von mir niht enbern·
Ich han den mv̊t·
swc si mir tůt·
dc sol mich alles dunken gv̊t·
si hat sich wol an mir behůt dú reine·
[268r] svnder got alleine·
so weis die frowen nieman die ich da meine·
Ich mv̊s den manen sinen schin·
benemen sol ch si behaben·
so lonet mir dú frowe min·
mag ich die werlt alvmbe graben·
meht ich gefliegen als ein star·
so tete dú liebe des ich ger·
vnd hohe sweiben als ein ar·
vnde ich zemale tvsent sper·
zertete als min her gamvret·
vor Camvoleis mit richer iost·
so tete dú frowe mine bet·
svs mv̊s ich haben hohe kost·
Ich han den mv̊t·
swc si mir tůt·
dc sol mich alles dunken gv̊t·
si hat sich wol an mir behůt dú reine·
svnder got alleine·
so weis die frowen nieman die ich da meine· [WS 1]
Si giht mvge ich der elbe ir flus·
benemen so tv̊ si mir wol·
dar zv̊ der tv̊nowe irn dvs·
ir herze ist ganzer tvgende vol·
den salamander mv̊s ich ir·
bringen vs dem fúre her·
so wil dú liebe lonen mir·
vnd tv̊t ze mir des ich da ger·
mag ich den regen vnd den sne·
erwenden des hoͤre ich si iehen·
dar zv̊ den svmer vnd den kle·
so mag mir lieb von ir geschehen·
Ich han den mv̊t·
swc si mir tůt·
dc sol mich alles dunken gv̊t·
si hat sich wol an mir behůt dú reine·
svnder got alleine·
so weis die frowen nieman die ich da meine· [WS 2]
Anmerkungen (Wikisource)
↑ Vorlage: Ich han· ⁊c̾·
↑ Vorlage: Ich han dē mv̊t· ⁊c̾·
Gegen disen winnahten·
solden wir ein gemelliches trahten·
wir swigen alzelange·
nv volgent mir ich kan vns froͤide machen·
ich singe iv wol zetanze·
vnd nim ir war der schonen mit dem kranze·
ir rose varwen wange [WS 1]·
ersehe ich dú dar zv̊ so koͤnde ich lachen·
so sich dú gůte
schreket vor so ist mir wol zemv̊te·
vnd ir gúrtel senken·
machet dc ich vnder wilent liebe mv̊s gedenken·
Dv liebes dv gv̊tes·
tv̊ hin la stan· dv wunder wol gemv̊tes·
wol stent dine loͤkel·
din múndel rot din oͤgel als ich wolde·
rose var din wengel·
din kelli blank da vor stet wol din spengel·
dv rehtes svmer toͤkel·
reit val din har· rehte als ichs wúnschen solde·
gedrat dine brúste·
nv tanze eht hin min liebes min gelúste·
la sitv́li bleken·
ein weninc dvr den willen min· da gegen mv̊s ich schreken·
Nv lachet aber min flehen·
ich schreke so dir bloͤzent dine zehen·
die sint wol gestellet·
vil schonú forme vnd herzeliebú minne·
nv tanze eht hin min svͤssel·
so hol so smal so wurden nie kein fuͤssel·
swen dc niht gevellet·
dc wisset der hat niht gv̊ter sinne·
wis sint ir beinel·
lindú diehel reit brvn ist ir meinel·
ir sizzel gedrolle·
swc man an frowen winschen sol· des hat si gar die volle·
Jv si der tanz erlǒbet·
so dc ir mine frowen niht bestǒbet·
seht an si niht dike·
ich fúrhte dc ir verliesent úwer sinne·
ir zimt so wol dc lachen·
dc tvsent herzen mvͤsten von ir krachen·
ir loslichen blike
twingent· mich owe dc tůt ir minne·
stet hoher lat slichen·
der schonen der sol man zerehte entwichen·
wc kan ir gelichen·
des wene ich niht dc ieman tv̊ in allen richen·
Ach si ist so schoͤne·
dc ich ir lob mit minem sange kroͤne·
ir wolstenden hende·
ir vinger lang als einer kv́niginne·
so ist si wol geschaffen·
da bi so kan si gemenliche klaffen·
gar ane missewende·
neme ich si vúr eine keiserinne·
des setze ich zepfande·
min herze dc ich niender in dem lande·
so gv̊tes niht erkande·
sist so minneklich gestalt· vnd lebt gar ane schande·
Anmerkungen (Wikisource)
↑ Vorlage: wengel.
Hie vor do stv̊nt min ding also·
dc mir die besten iahen·
ich wer [WS 1] den lúten sanfte bi· do hat ich holde mage·
si kerent mir den rugge zv̊· die mich do gerne sahen·
sit ich des gv̊tes niht enhan so gruͤssent si mich trage·
min dink hat sich gefuͤget so· dc ich mv̊s den entwichen·
der mir ê· von rehte entweich den lâsse ich vúr mich slichen·
si sint alle wirte nv die sant mir geste waren·
vnd bin ich doch der selbe der ich wc vor zwenzig iaren·
ich bin gast vnd selten wirt dc leben ist vnstête·
dvnke ieman dc es senfte si· der tv̊ als ich tete·
So mir min ding niht ebne gat· swar ich kere in dem lande·
so denke ich sa gegen nvͤrenberg· wie sanfte mir da were·
ich wolde haben da genv̊g· da man mich wol erkande·
ê ich bi den froͤmden hete niht gelǒbent mir ein mere·
ich tet vil maniges hie bi vor dc mich nv rúwet sere·
hete ich gewist dc ich nv weis· ich hete lihte mere·
in erkande do min selbes niht· des mv̊s ich dike engelten·
des lade ich die froͤmden in min hvs nv harte selten·
wol vf her gast ir svlt enweg so sprechent si mir alle·
in weis ob ieman disú fůre icht wol an mir gevalle·
ICh denke erbuwe ich mir ein hvs·
nach tvmber [268v] lúte rate·
die mir des helfen wellent nv die sint also genennet·
vnrat vnd her schaffe niht die koment mir vil drate·
vnd einer heisset selten rich der mich vil wol erkennet·
der zadel vnd der zwiuel sint min stetes ingesinde·
her schade vnd ǒch her vmbereit· ich dike bi mir vinde·
vnd wirt min hvs also vol braht von dirre massenîe·
so wissent dc mir von dem bvwe her in den bv̊sen snîe·
Rome bi der týuer lit der arn gat vúr pise·
als der tronte vúr pirscherer hin dú tvzer gat vúr rezzen·
grimvn lit dem pfate bi dur safoͤ gat div nise·
paris bi der seine lit dú mvsel gat fúr mezzen·
vúr basel flússet abe der rin· der neker vúr heilig brvnnen·
so ist dú elbe lange dur sachsen lant gerv̄nen·
lúrche ist ǒch der mase bi vúr púlan gat dú nise·
so flússet dur der vnger lant der wag vnd ǒch dú týse·
brage bi der ẘltach lit als wiene an der tv̊nǒwe·
swer des gelǒben welle niht der var vnz ers beschǒwe·
Ein wiser man der hies sin liebes kint also gebaren·
er sprach so dv zehoue sist so tv̊ nach miner lere·
dv solt den snoͤden froͤmede sin der fromen solt dv varen·
vnd wis in zúhtekliche bi des hast dv lob vnd ere·
swa dv sehst úbel tv̊n da von solt dv dich ziehen·
vngesuͤges lv̊der solt dv zallen ziten fliehen·
vnd trinke ǒch in der mâsse so das ieman missevalle·
dv solt den frowen sprechen wol so lobent si dich alle·
dv solt dich ruͤmen niht ze vil dc zimt wol von wiben·
vnd tůst dv dc so maht dv deste bas bi in beliben·
Anmerkungen (Wikisource)
↑ Vorlage: w̾e.
Wol im der nv beissen sol·
zepúlle vf dem gevilde·
der birzet dem ist da mit wol·
der siht so vil von wilde·
svmeliche gant zem brvnnen·
die andern ritent schowen·
der froͤide ist mir zervnnen·
dc bannet ma bi den frowen·
des darf man mich niht zihen ich beisse ǒch niht mit winden·
in beize ǒch niht mit valken in mag niht fúhse gelage·
man siht ǒch mich niht volgen nach hirzen vnd nach hinden·
man darf ouch nieman zihen von rosen schappel tragen·
man darf ǒch min niht warten·
da stet der gruͤne kle·
noch sv̊chen in dien garten·
bi wol getanen kinden· ich swebe vf dem se·
Ich bin ein erbeit selig man·
der niene kan beliben·
wan húte hie morne anderswan·
so ich dc iemer triben·
des mv̊s ich dike sorgen·
swie froͤlich ich da singe·
den abent vnd den morgen·
war mich dc wetter bringe·
dc ich mich so gevriste· vf wasser vnd vf lande·
dc ich den lib gefuͤre vnz vf die selben stvnt·
ob ich den lúten leide in snoͤden gewande·
so wirt mir dú reise mit freise wol kvnt·
daran solde ich gedenken·
die wile ich mich vermag·
in mag im niht entwenken·
ich mv̊s dem wirte gelten [WS 1] vil gar vf einen tag·
Wa leit ie man so grosse not·
als ich von boͤsem troste·
ich was ze kride vil nahtot·
wan dc mich got erloste·
mich slůgen sturn winde·
vil nach zeinem steine·
in einer naht geswinde·
min froͤide dú wc kleine·
dú růder mir zerbrachen· nv merkent wie mir were·
die segel sich zerzarten· si flugen vf den se·
die marner alle iahen· dc si so grôsse swere·
nie halbe naht gewunnen mir tet ir schrien we·
dc werte sicherlichen
vnz an den sehsten tag·
in mahte in niht entwichen·
ich mvͤs es alles liden als der niht anders mag·
Die winde die so sere wênt·
gegen mir von barbarie·
dc si so rehte vnsv̊sse blênt·
die an dern von túrggie·
die welle vnd ǒch die v́nde·
gent mir gros vngemvͤte·
dc si fúr mine sv́nde·
der reine got min huͤte·
min wasser dc ist truͤbe· min piscop der ist herte·
min fleisch ist mir versalzen· mir schimelget min win·
der smak der von der svtten gat· der ist niht gv̊t geuerte·
da vúr neme ich der rosen smak [WS 2]· vnd mehte es wol gesin·
zisern vnd bonen·
gent mir niht hohen mv̊t·
wil mir der hohste lonen·
so wirt dc trinken svͤsse vnd ǒch dú spise gůt·
Aht wie selig ist ein man·
der fúr sich mag geriten·
wie kvme mir der gelǒben kan·
dc ich mv̊s winde biten·
der schok von oriende·
vnd der von tremvndane·
vnd der von occidende·
arsúle von dem plane·
der meister ab den alben· der krieg vs romanie·
der levan dan vnd oster· die mir [269r] genennet sint·
ein wint von barbarie wêt· der ander von túrggie·
von norten kvmt der mezzol· seht dc ist der zwelfte wint·
wer ich vf dem sande
der namen wisse ich niht·
dvrch got ich fůr von lande·
vnd niht dvr dise vrage· swie we halp mir geschiht·
Das ich ze herren niht enwart· dc mvͤse got erbarmen·
des git mir des goldes niht· dc man da fuͤrt von walhen·
die herren teilenz vnder sich· so kapfen wir die armen·
wir sehen iemerliche dar· so fúllet man in die malhen·
so kvmt vns anderthalb von dúringen vil von gůte·
dc lâsse ich vf die trúwe min dc ich des niender mv̊te·
swie tvmb ich si ich vunde da den der mich gehielte schone·
ich were e iemer ane gv̊t e ich schiede von der krone·
dem kúnige sich ich wol in weis wenne er mir lone·
ICh solde wol zehove sin· da horte man min singen·
nv irret mich dc nieman weis in kan niht gůter doͤne·
der mir die gebe so svnge ich von hovelichen dingen·
ich svnge verrer vnd bas· von allen frowen schone·
ich svnge von der heide· von lǒbe vnd von dem meien·
ich sv̄ge von der svmerzit· von tanze vnd ǒch von reigen·
ich svnge von dem kalden sne· von regen vnd von winde·
ich svnge von dem vatter vnd der mv̊ter von dem kinde·
wer loͤset mir dú pfant wie wening ich der vinde·
Dv́ schonen wib der gv̊te win· dú mvrsel an dem morgen·
vnd zwirent in der wochen baden· dc scheidet mich von gůte·
die wile ich dc verpfenden mag so lebe ich ane sorgen·
swenne es an ein gelten gat· so wirt mir we zemv̊te·
vnd ich dú pfant sol loͤsen· so kvmt dc lieb zeleide·
so sint dú wib gar missevar· swenne ich mich von in scheide·
der gv̊te win der svret mir· swenne ich sin niht mag verpfenden·
wenne sol min tvmber mv̊t· an truren sich vol enden·
ia weis ich der herren niht· die minen kvmber wenden·
JA herre wie habe ich verlorn· den helt vs oͤsterriche·
der mich so wol behvset hat· nach grôssen [WS 3] sinen eren·
von sinen schulden wc ich wirt· nv lebe ich trurekliche·
nv bin ich aber worden gast· war sol ich armer keren·
der mich sin noch ergetze· wer tůt nach im dc beste·
wer haltet toren als er tet· so wol die stolzen geste·
des var ich irre nvn weis wa ich die wolgemv̊ten vinde·
vnd lebte er noh so wolde ich selten riten gegen dem winde·
der wirt sprichet weher gast wie frúzet úch so swinde·
Ze wiene hat ich einen hof· der lag so rehte schone·
lúpolzdorf wc dar zv̊ min· dc lit bi lvchse nahen·
zehinperg hat ich schoͤne gv̊t· got im der wirde lone·
wenne sol ich iemer mere die gúlte dar abe enpfahen·
es sol mir nieman wîssen· ob in klage mit trúwen·
min froͤide ist ellú mit im tot· da von mv̊s er mich rúwe·
wa wilt dv dich behalten iemer mere tanhvsere·
weist aber iemen der dir helfe buͤssen dine swere·
owe wie dc lenget sich sin tot ist klagebere·
Min soͤmer treit zeringe· gar· min pferit gat zesware·
die knehte min sint vngeritten· min malhe ist worden lere·
min hvs dc stat gar ane dach· swie ich dar zv̊ gebare·
min stube stet gar ane túr· dc ist mir worden swere·
min kelr ist in gevallen min kv́che ist mir verbrvnnen·
min stadel stat gar ane bant· des hoͤis ist mir zerrvnnen·
mir ist gemaln noch gebachen· gebrvwen ist mir selten·
mir ist dú wat zetúnne gar· des mag ich wol engelten·
mich darf dvrh gerete nieman niden noch beschelten·
Anmerkungen (Wikisource)
↑ Vorlage: geltem.
↑ Vorlage: ak.
↑ Vorlage: grôſen.
Dank habe der meie·
der hat maniger leie·
vúr gesant·
vf die liehten heide
dú wunnekliche lit·
vil zitelosen
maniger hande rosen
ich da vant·
was der ǒgen weide·
dú svmer wunne git·
vil der vogel singet·
zeschalle wider strit·
dc in dem walde erklinget·
ir schallen si zerehten froͤiden bringet·
sa zehant·
liese ich vil der swere dv́ mir wc e bekant·
Ich han dien ivngen·
vil da her gesvngen·
des ist lang·
als si mich des baten·
gegen den meien do·
dien lieben kinden·
sang ich bi den linden·
minen sang·
die mir liebe taten·
die schv̊f ich dike fro·
dc hat sich verkeret·
nv leider also·
swer hie fůge meret·
wirt der doch vil selten drvmbe gêret·
an ir dank·
sang ich in zeleide dien hohgemvͤte ist krank·
Wil si dú gůte·
dú gar wol gemv̊te·
troͤsten [269v] mich·
so vinde ich ein ende
der langen swere min·
wil si dú reine
troͤsten mich aleine·
so wirde ich·
fri vor missewende·
wil si mir gvnstig sin·
so lobe ich mit schalle·
si vúr des meien schin·
vnd vúr die blůmen alle·
dc nieman si der mir so wol gevalle·
frowe sich·
wie schone ich mich stelle swenne ich gedenke an dich·
Es slůg ein wib ir man zetode vnd al ir kint geswinde·
slůg si zetode seht dc was dem man vnmassen zorn·
zetode slůg er si her wider vnd alles ir gesinde·
slůg er ze tode doch wurden sider kint von in geborn·
got hies werden einen man
der nie geborn wart von frowen libe·
die vatter noch dú mv̊ter nie gewan·
die nam er im zewibe·
dar nach ein hunt erbal·
dc alle lúte die do lebten horten sinen schal·
dú erde ist hoher danne der himel dc hant die wisen meister wol bevunden·
hie vor bi manigen stunden·
ein kint dc slůg den vatter sin do es in der mv̊ter was·
do er den andern kinden sang von gote vnd in die rehten warheit las·