Texte

Johannes Hadlaub
Exportiert aus Wikisource am 6. September 2022
Johannes Hadlaub
[[Bild:|220px]]
* Ende des 13. Jahrhunderts in Zürich (?)
† um 1340 in Zürich (?)
Minnesänger
Artikel in der Wikipedia
Bilder und Medien bei Commons
Zitate bei Wikiquote
GND-Nummer 118544349
WP-Personensuche, SeeAlso, Deutsche Digitale Bibliothek
DNB: Datensatz, Werke
Werke
Texte
Ach mir was lange (Mit originalen Lettern) (Codex Manesse, Blatt 371v)
Ach mir was lange (Mit aufgelösten Abbreviaturen) (Codex Manesse, Blatt 371v)
Ich diene ir ſit das wir beidú waren kint (Codex Manesse, Blatt 371v und 372r)
Ich diene ir sit das wir beidú waren kint (Codex Manesse, Blatt 371v und 372r)
Wa vunde man ſament ſo manig liet (Codex Manesse, Blatt 372r)
Wa vunde man sament so manig liet (Codex Manesse, Blatt 372r)
Was man wunnen hoͤꝛte vn̄ ſach do voglin ſchal (Codex Manesse, Blatt 372r und 372v)
Was man wunnen hoͤrte vnd sach do voglin schal (Codex Manesse, Blatt 372r und 372v)
Minne iſt ſo wund̾lich (Codex Manesse, Blatt 372v)
Minne ist so wunderlich (Codex Manesse, Blatt 372v)
Als ſich min ſinne (Codex Manesse, Blatt 372v und 373r)
Als sich min sinne (Codex Manesse, Blatt 372v und 373r)
Er můs ſin ein wol beraten elich man (Codex Manesse, Blatt 373r)
Er můs sin ein wol beraten elich man (Codex Manesse, Blatt 373r)
Der ſitte iſt in oͤſterrich (Codex Manesse, Blatt 373r und 373v)
Der sitte ist in oͤsterrich (Codex Manesse, Blatt 373r und 373v)
Swer nimt ſchoner frowen (Codex Manesse, Blatt 373v)
Swer nimt schoner frowen (Codex Manesse, Blatt 373v)
Ich was voꝛ ir (Codex Manesse, Blatt 373v)
Ich was vor ir (Codex Manesse, Blatt 373v)
Ich wil ein warnen ſingen (Codex Manesse, Blatt 373v und 374r)
Ich wil ein warnen singen (Codex Manesse, Blatt 373v und 374r)
Ich was da ich ſach (Codex Manesse, Blatt 374r)
Ich was da ich sach (Codex Manesse, Blatt 374r)
Min h̾ze tůt mich ſoꝛgen rich (Codex Manesse, Blatt 374r)
Min herze tůt mich sorgen rich (Codex Manesse, Blatt 374r)
Swer arbeit můs han (Mit originalen Lettern) (Codex Manesse, Blatt 374r)
Swer arbeit můs han (Mit aufgelösten Abbreviaturen) (Codex Manesse, Blatt 374r)
Herbeſt wil biraten (Codex Manesse, Blatt 374r und 374v)
Herbest wil biraten (Codex Manesse, Blatt 374r und 374v)
Nv iſt ſumer ſo wol gegeſt das er ere hat (Codex Manesse, Blatt 374v)
Nv ist sumer so wol gegest das er ere hat (Codex Manesse, Blatt 374v)
Herbſt wil ab̾ ſin lob núwen (Codex Manesse, Blatt 374v und 375r)
Herbst wil aber sin lob núwen (Codex Manesse, Blatt 374v und 375r)
Die den wint̾ haten leit (Codex Manesse, Blatt 375r)
Die den winter haten leit (Codex Manesse, Blatt 375r)
Es get nu in die erne (Mit originalen Lettern) (Codex Manesse, Blatt 375r)
Es get nu in die erne (Mit aufgelösten Abbreviaturen) (Codex Manesse, Blatt 375r)
Dv́ voglin waren in mangen ſoꝛgen (Codex Manesse, Blatt 375r und 375v)
Dv́ voglin waren in mangen sorgen (Codex Manesse, Blatt 375r und 375v)
Ir ſult v́wer ſwenzel (Codex Manesse, Blatt 375v)
Ir sult v́wer swenzel (Codex Manesse, Blatt 375v)
Svmer hat geſendet vs ſin wunne (Codex Manesse, Blatt 375v)
Svmer hat gesendet vs sin wunne (Codex Manesse, Blatt 375v)
Wes ſol man beginnen (Codex Manesse, Blatt 375v)
Wes sol man beginnen (Codex Manesse, Blatt 375v)
Wunne wil vnwunne ſchoͤne v̾dꝛingen (Codex Manesse, Blatt 375v und 376r)
Wunne wil vnwunne schoͤne verdringen (Codex Manesse, Blatt 375v und 376r)
Wint̾ hat voꝛbotten vſgiſendet (Codex Manesse, Blatt 376r)
Winter hat vorbotten vsgisendet (Codex Manesse, Blatt 376r)
Wan mag roͤlich ſchowē (Codex Manesse, Blatt 376r)
Wan mag roͤlich schowen (Codex Manesse, Blatt 376r)
Nv wil der ſum̾ hinnen (Codex Manesse, Blatt 376r)
Nv wil der sumer hinnen (Codex Manesse, Blatt 376r)
Manig belangen (Mit originalen Lettern) (Codex Manesse, Blatt 376v)
Manig belangen (Mit aufgelösten Abbreviaturen) (Codex Manesse, Blatt 376v)
Ich were gerne fro (Mit originalen Lettern) (Codex Manesse, Blatt 376v)
Ich were gerne fro (Mit aufgelösten Abbreviaturen) (Codex Manesse, Blatt 376v)
Nv merkent mich ſw̾ noch tǒgen lige (Codex Manesse, Blatt 376v)
Nv merkent mich swer noch tǒgen lige (Codex Manesse, Blatt 376v)
Nach liebe gat leit (Mit originalen Lettern) (Codex Manesse, Blatt 376v und 377r)
Nach liebe gat leit (Mit aufgelösten Abbreviaturen) (Codex Manesse, Blatt 376v und 377r)
Wol der ſuͤſſen wandelunge (Codex Manesse, Blatt 377r)
Wol der suͤssen wandelunge (Codex Manesse, Blatt 377r)
Es iſt doch rechte klagelich (Codex Manesse, Blatt 377r)
Es ist doch rechte klagelich (Codex Manesse, Blatt 377r)
Nv ſtet ſo wol gebluͤmet (Codex Manesse, Blatt 377r)
Nv stet so wol gebluͤmet (Codex Manesse, Blatt 377r)
Owe voglin doͤne (Mit originalen Lettern) (Codex Manesse, Blatt 377r und 377v)
Owe voglin doͤne (Mit aufgelösten Abbreviaturen) (Codex Manesse, Blatt 377r und 377v)
Was meinēt nu dú vogellin (Codex Manesse, Blatt 377v)
Was meinent nu dú vogellin (Codex Manesse, Blatt 377v)
Manig hoher můt (Mit originalen Lettern) (Codex Manesse, Blatt 377v)
Manig hoher můt (Mit aufgelösten Abbreviaturen) (Codex Manesse, Blatt 377v)
Nv haben wir gewechſelt wol (Codex Manesse, Blatt 377v und 378r)
Nv haben wir gewechselt wol (Codex Manesse, Blatt 377v und 378r)
Ia klage ich die ſum̾zit (Codex Manesse, Blatt 378r)
Ja klage ich die sumerzit (Codex Manesse, Blatt 378r)
Swem ze můte (Mit originalen Lettern) (Codex Manesse, Blatt 378r)
Swem ze můte (Mit aufgelösten Abbreviaturen) (Codex Manesse, Blatt 378r)
Herbeſt wol ergezzen kan (Codex Manesse, Blatt 378r)
Herbest wol ergezzen kan (Codex Manesse, Blatt 378r)
Dv́ minne bꝛichet dike ir recht ir guͤte (Codex Manesse, Blatt 378r und 378v)
Dv́ minne brichet dike ir recht ir guͤte (Codex Manesse, Blatt 378r und 378v)
Es můs ein man (Mit originalen Lettern) (Codex Manesse, Blatt 378v)
Es můs ein man (Mit aufgelösten Abbreviaturen) (Codex Manesse, Blatt 378v)
In dem gruͤnen kle (Mit originalen Lettern) (Codex Manesse, Blatt 378v)
In dem gruͤnen kle (Mit aufgelösten Abbreviaturen) (Codex Manesse, Blatt 378v)
Swer wol kunne (Mit originalen Lettern) (Codex Manesse, Blatt 378v)
Swer wol kunne (Mit aufgelösten Abbreviaturen) (Codex Manesse, Blatt 378v)
Si iſt ſo lieblich wol geſtellet (Codex Manesse, Blatt 378v und 379r)
Si ist so lieblich wol gestellet (Codex Manesse, Blatt 378v und 379r)
Der ich leid̾ (Codex Manesse, Blatt 379r)
Der ich leider (Codex Manesse, Blatt 379r)
Sich froͤit vf die edlen nacht (Mit originalen Lettern) (Codex Manesse, Blatt 379r)
Sich froͤit vf die edlen nacht (Mit aufgelösten Abbreviaturen) (Codex Manesse, Blatt 379r)
Swem ſin můt (Codex Manesse, Blatt 379r und 379v)
Swem sin můt (Codex Manesse, Blatt 379r und 379v)
Nieman vol (Mit originalen Lettern) (Codex Manesse, Blatt 379v und 380r)
Nieman vol (Mit aufgelösten Abbreviaturen) (Codex Manesse, Blatt 379v und 380r)
Ich klage noch (Mit originalen Lettern) (Codex Manesse, Blatt 380r und 380v)
Ich klage noch (Mit aufgelösten Abbreviaturen) (Codex Manesse, Blatt 380r und 380v)
Der vil edle Reginſberg̾ was voꝛ ir (Codex Manesse, Blatt 380v)
Der vil edle Reginsberger was vor ir (Codex Manesse, Blatt 380v)
Editionen
Heidelberg, Universitätsbibliothek, Cpg 848, Bl. 371r bis 380v, Digitalisat UB Heidelberg bis UB Heidelberg
Joh. Hadloubens Gedichte, Zürich 1840. (Google)
Sekundärliteratur
Karl Bartsch: Hadlaub, Johannes. In: Allgemeine Deutsche Biographie (ADB). Band 10. Duncker & Humblot, Leipzig 1879, S. 301 f.
Burghart Wachinger: Hadlaub, Johannes. In: Neue Deutsche Biographie (NDB). Band 7, Duncker & Humblot, Berlin 1966, ISBN 3-428-00188-5, S. 417 f. MDZ München
Über diese digitale Edition
Dieses E-Book wurde aus dem Bestand der freien Quellensammlung Wikisource, einem Schwesterprojekt der Wikipedia, erstellt. Dieses mehrsprachige Projekt, dient dem Aufbau einer Bibliothek mit frei verfügbaren Inhalten und wird ausschließlich von Freiwilligen betrieben. Wikisource umfasst eine Vielzahl von Texten: Romane, Gedichte, wissenschaftliche Aufsätze, Reportagen, Gesetze, Zeitungen und Zeitschriften und vieles mehr.
Alle Werke bei Wikisource sind entweder gemeinfrei oder stehen unter einer freien Lizenz. Sie können dieses E-Book für jeden Zweck, auch kommerzielle, verwenden und beliebig weitergeben. Im Falle, dass der Text unter einer freien Lizenz steht, sind zusätzlich die entsprechenden Lizenzbedingungen zu beachten.
Wikisource ist immer auf der Suche nach neuen Mitarbeitern. Wenn Sie Interesse an einer Mitarbeit haben, finden Sie einführenden Informationen auf der Hauptseite von Wikisource.
Bei der Erstellung des Textes kann es leider zu Fehlern kommen. Wenn Sie einen solchen finden, bitten wir um entsprechende Informationen auf dieser Wikisource-Seite oder per E-Mail an ebook@wikisource.de.
ACh mir was lange·
nach ir so we gesin·
dauon dachte ich vil ange·
dc ir das wurde schin·
ich nam ir achte
in gewande als ein pilgerin·
so ich heinlichste machte·
do si gieng von mettin·
do hate ich vo sender klage·
einen brief dar an ein angil was·
den hieng ich an si dc was vor tage·
das si nit wisse das·
Mich dúchte si dechte·
ist das ein tobig man·
was wolde er in die nechte·
dc er mich grîffet an·
si vorchte ir sere·
min frowe wolgitan·
doch sweig si dur ir ere·
vil balde si mir intran·
des was ich gegin ir so gehe·
das echt si balde kême hinin·
dur das den brief nieman an ir gesêhe·
si brachte in tǒgin hin·
Wie si im do tete·
des wart mir nit geseit·
ob si in hinwurfe ald hete·
das tůt mir sende leit·
las si in mit sinne·
so vant si seligheit·
tiefe rede von der minne·
was not min herze treit·
dem tet si nie sit giliche·
das ir min not ie rechte wurde kunt·
owe reine minnenkliche·
dú tůst mich sere wunt·
IN getorste gisenden·
nie keinen botten ir·
wan si nie wolde ginenden·
ir trost irzeigen mir·
der ir kunt tete·
wie kûme ich si verbir·
vnd si gnaden bete·
nach mines herzen gir·
da uorchte ich ir vngedulde·
wan si mir ist darumb gihas·
dc ich so gar gerne hete ir hulde·
warumbe tůt si das·
MIn herze sere·
si mir durbrochen hat·
wan si da dur dú here·
so giwaltekliche gat·
hin vnd herwider·
doch es si gerne enpfat·
si lat sich drinne ǒch nider·
mit wunnen die si hat·
si kan so gefuͤge wesin·
swie si mer danne min herze si·
swie si drinne gat des mag ich ginesin·
arges ist si so fri·
MIch dunket man sehe·
min frowen wol getan·
der mir min brust vf brehe·
in minem herzen stan·
so lieblich reine·
gar wiblich lobesan·
in wige es doch nicht kleine·
das ich so mag han·
nu můs si mir doch des gunnen·
swie sere si sich froͤmdet mir·
doch gan si mir nicht der rechten wunnen·
der ich ie můte zir·
Owe dú minne·
wie wil si mich nu lan·
vnd ich doch mine sinne·
an ir bihalten han·
dc noch min herze
nie trost von ir gewan·
des wil mir sender smerze·
von not gesigen an·
sin kere mirs dannoch zegůte·
das si die reinen twinge gegen mir e·
das si mir zeheile der leiden hůte·
dur trúwe gar enge·
ICh diene ir sit das wir beidú waren kint·
dú iar mir sint·
gar swer gesin·
wan si wag so ringe minen dienest ie·
sin wolte nie·
gerůchen min·
das wart irbarmende herren dien warts kunt·
dc ich nie mit rede ir was giwesen bi·
des brachten si·
mich dar zestunt·
Swie ich was mit hohen herren komen dar·
doch was si gar hert wider mich·
si kert sich von mir do si mich sach zehant·
von leide geswant·
mir hin viel ich·
die herren hůben mich dar da si sas·
vnd gaben mir balde ir hant in min hant·
do ich des benant·
do wart mir bas·
Mich duchte das nieman moͤchte han erbetten si·
das si mich fri·
not hete getan·
wan das si vorchte dc si schuldig wurde an mir·
ich lag vor ir·
als ein tot man·
vnd sach si iemerlich an vs der not·
des irbarmet ich si wan ichs hate von ir·
des si doch mir
ir hant do bot·
Do sach si mich lieblich an vnd rete mit mir·
ach wie zam ir·
das so gar wol·
ich mochte si so recht geschowen wol getan·
wa wart ieman·
so froͤiden vol·
die wile lagen min arme vf ir schôs·
ach wie sůsse mir das dur min herze gie·
min froͤide nie·
mer wart so gros·
Do hate ich ir hant so lieblich vaste gotte weis·
dauon si beis·
mich in min hant·
si wande das es mir we tet do froͤte es mich·
so gar sůsse ich·
ir mundes beuant·
ir bissen was so zartlich wiblich fin·
des mir we tet das so schiere zergangen was·
mir wart nie bas·
das můs war sin·
[372r] Si baten si vaste eteswas geben mir·
des si anir·
lange hete gehan·
also warf si mir ir nadilbein dort her·
in suͤsser ger·
balde ich es nam
si namen mirs· vnd gabens ir wider do·
vnd irbaten si das si mirs lieblich bot·
in sender not·
wart ich so fro·
Der vúrste von konstenz· von zúrich dú vúrstin·
vil selig sin·
der vúrste ǒch sa·
von einsidellen von Toggenberg· lobelich·
graf friderich·
vnd swer was da
vnd half alt riet· das man mich brachte fúr si·
das taten hohe lút der frume Reginsberger·
nach miner ger·
ǒch was da bi·
Vnd der abt von petershusen tuginde vol·
half mir ǒch wol·
da waren ǒch bi·
edil frowen· hohe pfaffen· ritter gůt·
da wart min můt·
vil sorgen fri·
ich hate ir gunst die doch nit hulfen mir·
her Rudolf von Landenberg gůt ritter gar·
half mir ǒch dar·
vnd liebte mich ir·
Dem die besten helfent das veruat ǒch icht
dú zůuersicht·
wart mir wol schin·
wan der vúrste von kostenze loblich gerecht·
vnd her albrecht·
der brůder sin·
vnd her Ruͤdge Manesse die werden man·
hulfen mir vúr min edlen frowen klar·
des manger iar·
nie mochte irgan [WS 1]·
Es ist lang das mich von erst ir wunne vie·
vnd das ich nie·
so nach ir kan·
wan si stalte vngrůslich sich ie gegen mir·
des ich zů zir·
nie getorste gegan·
ich dachte sit si nicht růchet gruͤssen mich·
giege ich fúr si das were lichte so verre ir has·
nicht wan vmb das
verzagt dan ich·
Moͤchte ein herze von froͤiden dur den lib vsgan·
in moͤchte behan·
des minen niet·
sit ich vúr die wolgetanen komen bin·
von der min sin·
mich nie geschiet·
ich hate ir hant in minen henden ach·
est ein wunder das von rechten minnen nicht·
in der geschicht·
min herze brach·
Ach ich horte ir suͤssen stimme ir zarten wort·
si reiner hort·
des hat si pris·
so sach ich ir munt ir wengel rosen uar·
ir ǒgen clar·
ir keln wis·
ir wiblich zucht ir hende wis· als der sne·
mir was lieblich wol vnz ich můs dannan gan·
mir sendem man·
tet das so we·
Wol vns das der klingenberger vúrste ie wart·
die rechten vart·
die vv̊ren si·
dien zeherren walten er kan wise vnde wort·
der sinne hort·
der wont im bi·
sin helfe sin rat· sin kunst sint endelich·
des die wisen habten sin zeherren ger·
des heisset er
bischof Heinrich·
Anmerkungen (Wikisource)
↑ Vorlage: irgar.
Wa vunde man sament so manig liet·
man vunde ir niet·
in dem kúnigriche·
als in zúrich an bůchen stat·
des pruͤuet man dike da meister sang·
der Manesse rank·
darnach endeliche·
des er dú liederbůch nu hat·
gegen sim houe mechten nigin die singere·
sin lob hie pruͤuen vnd andirswa·
wan sang hat bǒn· vnd wúrzen da·
vnd wisse er wa·
gůt sang noch were·
er wurbe vil endelich darna·
Sin sun der kuster der treibs ǒch dar·
des si gar·
vil edils sanges
die herren gůt hant zemne bracht·
ir ere pruͤuet man dabi·
wer wîste si·
des aneuanges·
der hat ir eren wol gidacht·
das tet ir sin der richter si nach eren·
das ist ǒch in erborn wol an·
sang da man die frowen wolgetan·
wol mitte kan·
ir lob gemeren·
den wollten si nit lan zergan·
Swem ist mit edlem sange wol·
des herze ist vol·
gar edler sinne·
sang ist ein so gar edles gůt·
er kumt von edlem sinne dar·
dur frowen clar·
dur edil minne·
von dien zwein kumt so hoher můt·
was were dú welt· weren wib nicht so schoͤne·
dur si wirt so vil suͤssekeit·
dur si man wol singet vnde seit·
so gůt geticht·
vnd sůs gedoͤne·
ir wunne sang vs herzen treit·
Was man wunnen hoͤrte vnd sach do voglin schal·
so sůsse hal·
den sumer clar·
des man schone frowen sach sich dike ergan·
des werde man·
gerne namen war·
wan swerú zit kleit dú leiten si do hin·
des man sach wie wiblich wol si sint gestalt·
vnd manigualt·
ir lichten schin·
[372v] WAn si burgen nicht ir wunne· in suͤsser zit·
der winter git·
kalt winde vn sne·
des ir antlunt nekil kelen bergend sint·
an húten lint·
tůt winter we·
ir hende wis ǒch dike bergent si·
vnd sint in dien stuben des mans selten sicht·
wen tete das nicht
vil froͤden fri·
Nieman mag die sumerzit verklagen wol·
wan der der sol·
sin lieb vmb van·
dem ist winter lieb dur das dú nacht ist lang·
vúr voglin sang·
vúr schonen plan·
mir were ǒch so tete si gnade mir·
noch tůt si recht als das niemer súl irgan·
vf lieben wan·
diene ich doch ir·
ICh kume in dem sinne selten nicht vúr si·
das ich ir fri·
muge sanfte sin·
merker vnd dú hůte dú verderbent mich·
dur dú mide ich·
die frowen min·
ir wort dú snident si gent scharpfen slag·
doch sende ich ir min herze vnd min trúwe gar·
swenne ich nit dar
selb komen mag·
Was ich dur die merker vnd durch hůte lan·
das ich nit gan·
so dike vúr si·
das si sin verflůcht ir zungen sint so lang·
ir heler gang·
ist tuginde fri·
si sehent vmb sam dú kazze nach der mus·
dc der tieuel muͤsse ir aller pfleger sin·
vnd brechen in
ir ǒgen vs·
Ach ich sach si trúten wol ein kindelin·
dauon wart min·
můt liebes irmant·
si vmbeuieng es vnde truchte es nahe an sich·
dauon dachte ich·
lieblich zehant·
si nam sin antlúte in ir hende wis·
vnd truchte es an ir munt ir wengel clar·
owe so gar·
wol kuste sis·
Es tet ǒch zwar als ich hete getan·
ich sach vmbuan·
es ǒch si do·
es tet recht als es enzstuͤnde ir wunnen sich
des duchte mich·
es was so fro·
don mochte ich es nicht ane nit verlan·
ich gidachte owe were ich das kindelin·
vnz das si sin
wil minne han·
ICh nam war do das kindelin erst kam von ir·
ich nams zů mir
lieblich ǒch do·
es duchte mich so gůt· wan sis e· druchte an sich·
dauon wart ich·
sin so gar fro·
ich vmbeuieg es wan sis e schone vmbeuie·
vnd kusts an die stat swa es von ir kússet e was·
we mir doch das
zeherze gie·
Man gicht mir si nicht als ernstlich [WS 1] we nach ir·
als sis von mir·
vernomen hant·
ich si gesunt ich wer vil siech vnd siechlich var·
tet mir so gar·
we minne bant·
das mans nicht an mir sicht doch lide ich not·
das fuͤgt gůt geding der hilfet mir al daher·
vnd liesse mich der·
so were ich tot
Anmerkungen (Wikisource)
↑ Vorlage: enrſtlich.
Minne ist so wunderlich·
si kert sich·
an tumbe an wise·
alte iunge twingent si·
son ist ir zerich nieman·
noch zarn wan·
si slihet lise·
swem si wil dem ist si bi·
si lie mich ir helfe nie beuinden
vnd twinget mich sere gegen ir·
vnd si nicht gegen mir·
minne dir
mag ich wol flůchen tiefe
vs mines herzen gir
Minne suͤne dich mit mir·
ker zů zir·
ald ich wil strafen dich·
die wile ich leben mag·
vnd liebe noch ir mich·
ald vf dich·
so schrye ich wafen
mange nacht vnd mangen tag·
owen minne kum ir noch zeherzen·
mir zeheile son flůche ich dir nicht me·
in weis anders wies erge·
mir ist we·
von sendem smerzen·
minne noch min not verste·
JAn wisse ich es nicht ir·
das si mir·
ist so gar herte
ich wîsse es der minne gar·
wan si lat ir lib so fri·
vnd doch si
wol si gelerte·
das si min noch neme war·
owe sit si nicht enhat der minne·
wauon solte si dan růchen min·
minne wirde mir noch fin·
kere hin
vnd twinge ir sinne·
so wil ich din frúnt noch sin·
Als sich min sinne·
nach ir minne
stelsent vnde hulfe si mir·
es were ir
súnde nicht·
wan sender smerze·
wil min herze·
bringen in todes has·
ob si das·
nicht versicht·
vf mine trúwe· si wirt schuldig an mir·
ob nicht ir guͤte·
min gemuͤte·
troͤstet es ist min tot·
lieb die not·
klage ich dir·
LAs [WS 1] dich erbarmen·
mich vil armen
wunden du tůst mir das·
du [373r] gist bas·
mir ǒch wol·
das tů noch reine·
wan ich meine·
dike mit trúwen dich
als ǒch ich
billich sol·
wan ich bin gar vnd gar lieb din eigen knecht·
min kúneginne·
bring mich inne·
trostes est nicht zefrů·
wan darzů
hast dú recht·
Das recht dú here·
lange sere·
brichest swie
lob von mir doch ie·
dir vs erschal·
vnd dir min trúwe·
ie so núwe
waren das alles veruie·
mich doch nie·
uberal·
doch mechte ich niemer ir lob gesingen gar·
doch sol die suͤssen·
min lob gruͤssen·
iemer so ich beste kan·
dauon wan·
si ist so clar·
Anmerkungen (Wikisource)
↑ Vorlage: LAch.
ER můs sin ein wol beraten elich man·
der hus sol han·
er muͤsse in sorgen sten·
notig lidig man froͤit sich doch mangen tag·
er sprichet ich mag
mich einen sanft begen·
ach notig man kumst du zer e·
wan du kume gewinnen macht můs vnde brot·
du kumst in not·
hus sorge tůt so we·
So dich kint anuallent so gedenkest du
war sol ich nu·
min not was e so gros·
wan dú fragent dike wa brot vnd kese si·
so sizzet dabi·
dú můter ratis blos·
so sprichet si meister gib vns rat·
so gist in dan rúwental vnd súftenhein·
vnd sorgen rein·
als der niht anders hat·
So spricht si dan· ach das ich ie kan zů dir·
ian haben wir·
den witte noch das smalz·
noch das fleisch noch vische pfeffer noch den win·
was wolte ich din·
son kan wir niender salz·
so rúwetz ir· da sint froͤide vs·
da vat frost vnd turst den hunger in das har·
vnd zihent gar·
oft in al dur das hus·
Mich dunket das hus sorge tůie we·
doch klage ich me·
das mir min frowe tůt·
swenne ich fúr si gen dur das si gruͤsse mich·
so kert si sich·
von mir dc reine gůt·
so warte ich iemerlichen dar·
vnd sten verdacht als ein ellender man·
der mich enkan·
vnd des nieman nimt war·
Das si mich verseret hat so manig iar·
das wolt ich gar·
lieblich vergeben ir·
grůste si mich als man frúnde gruͤssen sol·
so tete si wol·
si súndet sich an mir·
wan ir min trúwe wonet bi·
dauon solte si mich gruͤssen ane has·
wan tůt si das·
das si iemer selig si·
Der sitte ist in oͤsterrich [WS 1]
vnminnenklich·
das schone frowen
tragent alle huͤte breit·
wan ir minnenklichen var·
mag man gar·
selten geschowen·
so si ir huͤte hant vfgeleit·
mangen wer dú zit gar unuerdrossen·
sehe man dike ir wengel·
vnd ir liechten ǒgen schin·
wan werin die huͤte geflossen·
tůnowe ab so mechte es sin·
In kunde mich irweren nie·
swanne ich ie·
sach schone frowen·
es gienge in mines herzen grunt·
swas man in der welte sicht·
wan mag nicht·
so gerne schowen·
das ist mir wol worden kunt·
swenne ich sihe ir wiblich losen sitte·
ir hende wis· ir kelen blank·
so ist min herze ane allen wank·
in so lieblich danne mitte·
vnd ist wilde min gedank·
IN swelch lant aber ich ie kan·
in gesach an·
dikeiner frowen
nie so los gebâren me·
als min frowe gebaret sich·
des tůn ich·
ezwenne ein schowen·
vnz mir wirt senlichen we·
so denke ich an lieblich vmbeuange·
vnd an ezwas mer da bi·
nieman wisse wie mir danne si·
sendú not tůt mir gedrange·
so ich si sihe so wandels fri·
Man gicht wes ich achte an ir·
si si mir
doch gar zehere·
warumbe ich si minne gar·
si nant vnrecht der getat·
so si hat·
ie hoher ere·
so ist min sin ie stêter dar·
in weis an ir nicht das ich mug strafen·
wan ein ding enwere das·
so geuiel mir nie wib bas·
dar uf ich ie schrîje wâsen·
es ist gegen mir ir has·
Koͤnde ich loben vnz vf den grunt·
mir ist kunt·
war ich das spreche·
da es rechte were biwant·
miner frowen lobesan·
dú wol kan·
an eren gehe·
sin das ist mir wol erkant·
si ist so minnenklich [WS 2] vnd seldebere·
zucht vnd eren ist si gůt·
si hat reinen hohen můt·
si ist ir worte gar gewêre·
si ist vor valsche gar behůt·
[373v] ICh habe des vil steten můt·
frowen gůt
dien wil ich meren·
ir lob lebe ich mange zit·
wan des sint si wert so wol·
si sint vol´
so manger eren·
das ist gar ane allen strit·
si sint milt vnd minnenklich gistellet·
vnd hant da bi tugende vil·
er kumt an der selden zil·
swer sich oft zůzin gesellet·
der hat wunnen swas er wil·
ICh mane v́ch vil schonen wib·
das min lib
mit stetem můte·
ganze trúwe gegen v́ch hat·
das ir helfent klagen mir·
das von ir·
das mich dú gůte·
in so sendem leide lat·
nach der ich vil dike súfte sere·
vnd da mitte spriche owe·
ich můs truren iemer me·
sich erbarm danoch dú here·
vber mich das sis verste·
Anmerkungen (Wikisource)
↑ Vorlage: oͤſterriche.
↑ Vorlage: minnenkich.
Swer nimt schoner frowen·
durch ir wunne war·
der get dar·
gerne swa er si sehen mag·
wan das suͤsse schowen
in sin herze gat·
sůsse inpfat
es doch senlichen slag·
swenne er ir wunnen inret sich·
die so loslich sint vnd so wiblich gimeit·
dú suͤssekeit·
ǒch dike wundet mich·
ER wirt wilder sinne·
der wol kan enzstan
wie wunnesan
doch schone frowen sint·
vnd wirt wol der minne·
wan manig frowe gůt·
zartlich tůt·
alsam ein zartes kint·
wan si sint so zartlich gestalt·
so minnenkliche mir bihagt ir wunne bas·
danne alles das·
zer welte wunne ist gezalt·
Swa mannes herze minnen
gert an selker stat·
dar er hat·
heinliche wol manig stunt·
der mag lieb gewinnen·
heinliche tůt vil·
ob er wil·
ald im vf minne ist kunt·
swanne er ist siner frowen bi·
so klegt er ir sin not senlich als er sol·
der mag wol
sender not werden fri·
Den sin herze twingit·
das er minne ein wib·
der sin lib·
můs stete froͤmde sin·
in not es in bringit·
anders wirt im nicht·
sam geschicht·
mir gegen der frowen min·
wenne solte erbarmen si min not·
vnd ich ir nicht klagen mag sende vngimach·
ach vnd ach·
des sint min froͤide tot·
ICh enmag getrúwen·
leider des nicht ir
das si mir·
noch gúnne heiles vunt·
doch wil mich nit rúwen·
dc ich diente ir ie·
swie mir nie·
kein trost wart von ir kunt·
wan si ist ein frowe valsches fri·
wol gistalt vil schone vnd da bi minnenklich·
ach solde ich·
ich ir tǒgen wesen bi·
ICh was vor ir·
das ich wol min iamer ir geklaget solde han·
min sendú gir·
wart so gros das si mich dar nit reden wolde· lan·
wan si was so rechte wunnenklich getan·
das ich nicht mochte vor liebe in minen sinnen bestan·
wan swenne ein man·
wirt ze rechte fro·
son enweis er noch inkan·
recht also·
irgieng mir senden leider vor ir do·
Das herze min·
wart so rechte muͤde von gidanken in der stunt·
e sender pin
mich gar vberstritte da was froͤide mir wol kunt·
sendú noch gieng mir zeherzen in den grunt·
do dachte ich owe lieblich gestellet so roter munt·
do ward ich wunt·
von sendem iamer gros·
mich bant der minne bunt·
minne schos·
mich dc ich minen sin so gar verlos·
Owe dc ich·
ir nit machte giklagin· min vil langes vngemach·
ir wunne mich·
tet so gar verzagen· wan ich si so schoͤne sach·
ich dachte mir so rechte nahe senlich ach·
da mir so gar min sprache· in minem herzen do brach·
ich wart so swach·
von ir wunnen fin·
das ich dachte
herze lach
froͤide din·
das wart ǒch leider mir do balde schin·
ICh wil ein warnen singen·
das lieb von liebe bringen·
nv mag die mâsse kunnen han·
sus rate ich dien ein scheiden·
der ich nu huͤte beiden·
der tag der wil so schiere vf gan·
des ich wunder sorgen han·
wie es vns noch irgange·
ir nahen vmbeuange·
die wellent si so kume lan·
IN gibe dem herzen nit die schulde·
ich weis ir vngedulde·
so wol si lat in kume varn·
der herre sol si lâssen weinen·
der nacht [374r] ist noch so kleinen·
er sol es langer nicht ensparn·
nu bin ich aller froͤiden arn·
ich vúrchte mir so sere·
es stat vmb lib vnd ere·
in kan ir nicht biwarn·
Sin volgen danne minem rate·
vnd tůnt si das zespate·
owe ich bin mit in verlorn·
nu hoͤrent si doch wol min warnen·
mus ich ir min erarnen·
noch me dc ist mir leit vnd zorn·
owe das ich wart erkorn·
das ich wart irwachtere·
noch wendent vnsir swere·
den tag man kúndet dur dú horn·
ICh was da ich sach·
in ir swert zwen dorper grisfen iunge·
Růdolf da bigonde in zorne stetschen·
Chúnze dar zů sprach·
nieman ist dem an mir ie gelunge·
ich han dinen zorn nit wan vúr getschen·
Růdolf sprach du hast ellen gemeinet·
nach der ich vil dike han geweinet·
huͤt dis libes vor mir·
an dem werde an sunnentage vor ir·
din schulde ist das ir hulde gegen mir kleinet·
Si swigen darzů·
das mans verre vernam in kurzer stunde·
dar kam doͤrper vil mit grôssem schalle·
Růdolf malch sin chů·
vn růfte dien dien er gůtes gunde·
trinkint vnd sint mir bi húte alle·
helfe man im so helfent mir ǒch sere·
das ich vor ellen beiage húte ere·
ich wil Chůnzen slan·
das hunde min mugen zim herzen gan·
ern gewirbt vmb ellen niemer mere·
Wir suns vnderstan·
sprachen zwene der wegsten vnd der Meyer·
bittent Chůnzen dc er Ellen abe lâsse·
des mag nicht ergan·
ich gab ir ein geis· vnd hundert eyer·
vnd bin ir holt recht ane mâsse·
da vúr sol dich Růdolf vil wol mieten·
nu lant hoͤren· was wil er mir bieten·
zwo geîsse vnd ein hůn·
Chůnze sprach das wil ich gerne tůn·
ich tet ie das biderbe lúte mir rieten·
Min herze tůt mich sorgen rich·
es achtet wa so minnenklich·
ein reinú frowe si·
vnd wie si sich gebare· ir wonent zúchte bi·
si ist gar wandels fri·
Vil suͤsse minnenkliches wib·
vnd froͤitent ir noch minen lib·
mit v́werm holden grůs·
so kême ich gar vs leide darinne ich sterben můs·
ir tůnt mich sorgen bůs
Ach gebe mir dú gůte bas·
so wurde ich noch als ich do was·
do ich ir kúnde vie·
ich was vil froͤiden riche dú mir do gar engie·
do ich mich an si lie·
Owe verneme si noch die klage wie vil ich herzen iamers trage·
dc kumt von sender not·
wil mir die nicht benemen ir munt so rosen rot·
owe so bin ich tot·
Owe wie we mir da geschach·
do ich min lieben frowen iach·
so schone vor mir stan·
mich balde des geduchte ich muͤse min froͤide lan·
do ich muͤse danan gan·
Noch were ich lang da gesîn·
wan das ich vorchte der lúte pin·
vnd der vil valschen has·
das sú mich wolten niden das mir so sanfte was·
do ich vor ir gesas·
ICh schowete si vil manigualt·
mich duchte in wurde niemer alt·
vnd solde ich bi ir sin·
mit ir wolgůten willen so were min sorge hin·
vnd sendes herzen pin·
Swer arbeit můs han
vil wunder dike·
die sint alle froͤiden blos·
als ǒch die minnere·
dien ir frowe niht gan·
ir ǒgen blike·
die sint wol koler genos·
wan die růwe sint lere·
vnd die můssen haken vnde rúten·
die klage wir betúten·
das vns dú minne gisellet·
zů dien arbeit kellet·
Wir mun vns zů dien
ǒch wol gelichen·
swele echt stête karrer sint·
der not ist ǒch wunder·
si mvn nicht geflîen·
das si entwichen·
swenne kumt regen vnde wint·
das karren gent vnder·
so hebent si das gat dur ir herze·
als vns sender smerze·
der růret ǒch zegrunde
des sint senden wunde·
Minner herze vicht
zeganzer stête·
als in einem sake ein swin·
das vert vnde kirret·
doch klegte ich es nicht
obs mins nicht tete·
das ruͤrt ǒch vil sender pin·
dc mich růwen irret·
minne klenmet rechte alsam ein zange·
swens an kumt gidrange·
den kúmbirt vngemuͤte·
es wende liebes guͤte·
Herbest wil biraten·
mang gisinde [374v] mit gůten trachten·
bi der glůt als swa si sin·
veIsse swinin brâten·
dar vmbe sol ir wirt in achten·
vnd ǒch bringin gůten win·
wirt bisende vns wúrste·
da bi schefin hirne·
das in dú stirne·
glostende werden als si in sin angizunt·
mache in das si túrste·
salze in vast der ingwant terme tůn den herbst mit vollen kunt·
So der hauen walle·
vnd das veisse dar inne swimme·
so bigús in wissú brot
danne sprechinz alle·
herbst ist bessir danne ein gimme·
wol dem wirte ders vns bot·
hande in ente fuͤsse·
darzů gůt gislechte·
so kunst in rechte·
vnd stet da bi des herbstes ere wol·
swer mi truren muͤsse·
der hoͤrt nicht zů dien frêssen· wan si werdet froͤiden vol·
Swer sich welle mesten·
der sol kleren zům gisinde
gůte vůre machit si veis·
wirt bisend dien gesten·
gense die da sien blinde·
vnd mache die stubun heis·
du solt huͤnr in vúllen·
dannoch sieden kappen·
froͤliche knappen·
hast du danne in stuben vnd ǒch bi der glůt·
heis in tuben knúllen·
schúzzen vnd ǒch vasande wilde· das nemt si vúrs meien blůt·
Welt du bist vngliche·
frêssen dien ist wol gischehen·
das tůt mangem minner we·
frowen minnenkliche·
mugent si nu nit gesehen·
als sús san des sumers e·
si hant nu verwunden·
dú antlút in ir stuchen·
dc sú nit ruchen·
swere winde tůnt an linden húten we·
we vns kuͤler stunden
rosen wengel sint verborgen· vnd ir keln wis als der sne·
Wir sorgen nit eine·
vogel die hant grossen swere·
in tůt ǒch der winter leit·
wir suns han gimeine·
wir sin beide froͤiden lere·
dulden sament arebeit·
wan bi ir gedoͤne
was vns dike sanfte·
do dú amsel kamfte·
mit der nachtegal
do horte man suͤssú liet·
vnd die frowen schoͤne
do die minner mochten schowen· des enmuns nv leider niet·
Nv ist sumer so wol gegest das er ere hat·
in schoͤner wat·
mag man in nu wol sehen·
rot brun gel bla wis gruͤne ist sin kleit var·
swer sin nimt war·
der mag im wunne iehen·
in lobent mit suͤssem sange dú vogillin·
dú sehent so lichten schin·
mit dien sol man froͤlich sin·
swie schoͤn dú zit sint truͤbe ist mir doch min můt·
wan mich getroste noch nie min frowe gůt·
Es ist lang das ich min frowen von erst gisach·
min vngemach·
hůb sich do suͤssekliche·
wan ich wart von ir wunnen [WS 1] suͤsses liebes vol·
mir tet da wol·
das si was wunnenriche·
nu můs mir das leider we tuͤn ellú zit·
wan si mir nicht trostes git·
des min herze in arbeit lit·
wan were si âne wunne so were mir nit we·
nach ir als es sus sin můs iemer me·
Noch ist mir wol der stunde swa ich si siche an·
swies mir ist gran·
doch habe ich si zefrowen·
doch wirt das lieb vergulten mir mit leide iesa·
so si nicht da
mer ist da ichs muge schowen·
so ist mir als so der sunne hinder gegat·
vnd der tag sin wunne verlat·
froͤiden vil si doch ie hat·
bi andern schonen frowen noch achtet nicht·
swie we mir von senlicher not gischicht·
Anmerkungen (Wikisource)
↑ Vorlage: wūnnen.
Herbst wil aber sin lob núwen·
er wil brúwen·
manigen rat·
wan das stat·
dien sinen eren wol·
er wil manig her biraten·
veisser brâten·
vnd will
trachten vil·
dar zů si machen vol·
des sin lob sich vͤben sol·
núwen win·
trinkent sú ders hirne ruͤret·
vnd ǒch vuͤret·
ir můt ho·
des sú fro·
danne alle muͤssen sin·
Wv́rste vnd hanmen gůt geslechte·
ǒch in rechte
herbest birt·
darzů wirt
in noch sis rates me·
igwant blezze term vnd magen·
vnd ǒch kragen·
zů der glůt·
herbest tůt·
in bas danne sumer e·
man slecht nu so manig ve·
des vint man guͤtú kroͤsú hǒbt vnd vuse
vnd ǒch sůsse·
hirn vnd die·
herbst was ie·
sins rates lobesam·
Nv sol ein wirt sinen gesten·
gebens besten·
des vns git·
herbstes zit·
so hat er wol getan·
des von rate vf můssen glosten·
swas dc kosten·
danne súl·
wirt so vúl·
si das sú vollen han·
an klobwúrste solt dus nicht lan·
[375r] mangen bůg·
gib in darzů gůte grieben·
des in lieben·
herbest můs·
wirt nu tůs·
so hant si danne genůg·
Doch klage ich des sumers schoͤne·
vnd die doͤne
wunnenklich·
der so rich·
e was vil manig lant·
die die wilden vogel sungen·
das sú klungen·
das der schal·
sůze hal·
des was vns froͤde irkant·
die wen toͤsen winters bant·
dú so kalt·
sint das heide vnd owen velwent·
vnd ǒch selwent
tage clar·
das tůt bar·
vns froͤide manigualt·
Noch klage ich min meisten swere·
dc mich lere·
trostes ie·
min frowe lie
swie we mir nach ir was·
vnd si mich lat sus verderben·
vnde werben
in der not·
das der tot· mir tete lichte bas·
wan es neme schiere ende das·
sus lat si·
mich in langem vngemuͤte·
ald ir guͤte·
wende es noch
wan ir doch·
min trúwe wonet bi·
Die den winter haten leit·
wan si mangen tag san truͤben·
vnd ǒch gar vnmâssen kalt·
die hant nu vil suͤssekeit·
vogel went den sumer vͤben·
mit ir stimme manigualt·
heide die stant gruͤn·
vnd gel von blůmen· vnd der sunne kuͤn·
sis schoͤnen glanz·
da bi sicht man blůme bluͤn·
da wir vnder suln schowen·
schoner frowen
mangen tanz·
Es ist ǒgen wunne hort·
so man schone frowen sament·
in dien bǒngarten sicht gan·
da hoͤrt man ir senften wort·
wan si sich so wiblich schament·
so ir achtent iunge man·
man sicht da an in
so los giberde· das der manne sin
wirt froͤlich gar·
e der sumer vns irschin·
da was man der wunnen âne·
vnd vf plane·
manger var·
MAn sol billich froͤide han·
sumer ist so rechte schoͤne·
alles des er haben sol·
doch bin ich ein trurich man·
das tůt mir die ich da kroͤne·
der ist mit minr arbeit wol·
si hat vil gilacht·
mins herzen súften· des nam ich danne acht·
vnd tet mir we·
sis so wunnenklich gemacht·
das si wont mir in dem můte·
dú vil gůte·
swies erge·
Es get nu in die erne·
vil schoner dirne fin·
swer froͤide habe gerne·
der ker mit in dahin·
darzů get manig eile·
dar mit ir tochterlin·
das kumt v́ ǒch zeheile·
went ir geslǒfig sin·
hete ich ein lieb das gienge dar·
ich neme sin in der schúre war·
da wurde ich lichte sorgen bar·
Es ist dien wol geteilet·
der frowen gênt dahin·
des sich ir herze geilet·
es wirt licht ir giwin·
wol vf ir stolzen knechte·
dien stet vf minne ir sin·
v́ch kumt dú erne rechte·
wan tůt v́ch zemen in·
da sagent spel ir ivngen man·
dú man wol ane lernen kan·
statte machet lichte dams v́ da gan·
Swer sich kan zůgemachen·
swies si von erst in leit·
es wirt darnach ir lachen·
so spel giseit·
als man vf stro sol sagen·
da dirnen sint gemeit·
ob si das wen vertragen·
das toͤdet sende arbeit·
da ist dú kurzewile gůt·
mit speln sam enentz baches tůt·
wol vf in die ern dú hoͤhet můt·
Dv́ voglin waren in mangen sorgen·
noch aldaher den winter kalt·
si smuchten sich die kuͤlen morgen·
in snewe stůnt so gar der walt·
nu wellent si sich zweien·
si hant ersehen die lichten zit·
die blůmen lachent gegen dem meijen·
der manigem herzen froͤde git·
Man hoͤret suͤsseklichen doͤne·
swer sich des morgens wil irgan·
vnd sicht die lieben heide schone·
in wunneklicher varwe stan·
swas ich vil sender schowe·
der blůmen vnd der rosen rot·
doch můs ich sorgen want min frowe·
mich tůt an minen froͤiden tot·
ICh súfte sere vnd minnenkliche·
vnd wandelt sich min stetú uar·
swenne ich si sich so wunnenriche·
vnd si min nimt so kleinen war
vnd mecht von leide ersterben·
ieman ich were nv lange tot·
in mochte ir helfe nie erwerben·
dauon leb ich in grôsser not·
Sol ich die gůten lange miden·
swie doch nieman von leide erstarb·
ich můs den tot nach ir erliden·
wan ich nie heil an ir irwarb·
wil si min nicht ern·
noch lieblich hohgemuͤte geben·
vnd ǒch ir froͤmden gar verkern·
so můs vnlenge sin min leben·
Doch hab ich si mir selb erwellet
vnd [375v] wil genaden gern von ir·
swie mich dú reine in iamer vellet·
doch stet nach ir· mins herzen gir·
nun[WS 1] wil ǒch niemer keren·
von ir die besten trúwe min·
sol ich verderben nach der heren·
si můs in hohen schulden sin·
Anmerkungen (Wikisource)
↑ Vorlage: non.
IR sult v́wer swenzel·
krispen dirne gůt·
est erne zit krenzel·
machen ǒch vf die virtage·
swiem arebeit in erne·
hat doch hat man můt·
da froͤlichen gerne [WS 1]
pfligt man da so loser sage·
wan dar kumt so
manig stolzú dirn· vnd knappe des man da wirt fro·
ir singet dan so
vil suͤssekliche ho·
ǒch ist erne recht froͤide vf dem stro·
Heinlichi mag enden·
vil der die han mag
zînr frowen wol wenden·
tůt sin des licht senden pin·
der aber frowen minnen·
gert der hůte pflig tag·
vnde nacht gewinnen [WS 2]·
wirt im da lichte niemer schin·
des bin ich bar
froͤiden vnd vol sorgen wies geuar
wan ǒch ich dar·
minne [WS 3] da mich hůte froͤmdet gar·
frǒmdes frúnds nam ie so kleine war·
Minne din suͤs twingen·
hat betwungen mich
in suren strit· ringen
tůst du mich mit sender not·
dú gist mir zeherzen·
sůs ein wib der ich
můs froͤmde sin smerzen·
můs mich das vnz vf den tot·
ir wunne gat·
so sůsse mir zeherzen es verstat·
die gitat·
so wol das si so mange wunne hat·
des minne mich von ir nit scheiden lat·
Anmerkungen (Wikisource)
↑ Vorlage: da froͤlichen můt· gerne.
↑ Vorlage: nacht vnde tag· gewīnen.
↑ Vorlage: dar minne ǒch ich.
Svmer hat gesendet vs sin wunne·
secht die blůmen gent vf dur das gras·
luter clar stet nu der lichte sunne·
der den winter e· vil truͤbe was·
schoͤn ǒgenweide
bringt vns der meie er spreit vf dú lant sin wat·
were ich nicht in senelichem leide·
vf der heide·
wurde mir sorgen rat·
Der ich alle mine tage diente·
dú gesprach noch nie zemir hadank·
das tůt mir als der min herze pfriente·
owe si machet ser min leben krank·
ich moͤchz irbarmen·
ich bin so verre komen in vil sende not·
des můs ich in iamer dike erwarmen·
vnd ǒch armen·
bis vf minen tot·
ICh versůchte von not an minem herzen·
ob es mechte sich von ir gekern·
da tet es mir kunt so si senden smerzen·
das es niemer mechte sich ir erwern·
ich bin gebunden·
in ir ginade· wil si so wirde ich irlost·
wil aber si mir seren herzen wunden·
zallen stunden·
owe wa ist ir trost·
Wes sol man beginnen·
sit nv můs der sumer hinnen·
der so mangú wunne bar·
man sol leider truren·
suͤssú zit dú wellent suren·
truͤbe werdent die tage clar·
ungelúkehafte minnere·
die muͤssen zwei leit nu han·
in ist winter swere·
so sint si ir frowen vmmere·
zů dien mag ich leider gan·
Wil dú seldenriche·
das ich iemer mich geliche·
zů dien die vngelúke hant·
so we mir der stunde·
das ich schowen si bigunde·
do mir wart ir wunne erkant·
wan ich můs mich ir da geben·
ich sach ir wunnen so vil·
si mag mir min leben
kúrzen alder froͤide geben·
si tůt mir wol swie si wil·
ICh mag wol die minne·
strâfen das si mine sinne·
an mine frowen hat geleit
vnd aber sis nit twinget·
gegen mir vnd ǒch innan bringet·
das so we tůnt sendú leit·
des mag si mich wol varen lassen·
wan si lat dv́ minne fri·
des si min verwâssen·
sin enwelle sich danne an mir mâssen·
alder ǒch betwingen so·
Wunne wil vnwunne schoͤne verdringen·
des mans hoͤrt vnd sicht wol swers nimt war·
secht ob das· mug manig herze froͤiden wern·
est wunnenklich zehoͤrn· der voglin singen
so ist wunnenklich zesehen mang schoͤn var·
vns wil sumer froͤide vnd wunne bern·
des sint alle fro
wan die tulden senden pin·
dien stêtz so
dams in nicht mag gemůten· ich glǒb in bi mir· wan mich lat sin·
ǒch in sender not das frowe min·
Vnrechte minner irrent recht minnere·
einer machet das vieren missetrúwet wirt·
der nicht heln kan ald aber heln nicht wil·
des das sînr frowen eren dan wirt swere·
vnd aber es im ere danne birt·
des erwindet lieber minne vil·
doch solte es nit
engelten ein getrúwer man·
der gerne sicht
das sin minnen si tǒgen vnd er das vil wol [376r] geuuͤgen kan·
an den mag sich wol ein gůt wib lan·
Dv́ leide hůte irret recht minner sere·
vnd ǒch der verwâssen merker spehen·
si froͤmdent ir frowen in mangú zit·
dien ǒch dan ir frowen sint zehere·
die mugen ǒch dc vúr ein irren iehen·
dist alles wider der minner heile ein strit·
swie vil keinen·
das irret so irz mich noch me·
ich han kleinen
glúkes ze minr schonen frowen· si schúhet mich sams si gegen mir giue·
mir wart ir nie nicht wan ach vnd we·
Winter hat vorbotten vsgisendet·
die hant vogel suͤssen sang erwendet·
so velwent si dem sumer sin schone var·
der botten heisset einer súrú bise·
dú lêrt mangen húre citerwise
darnach wirt man snewes vnd rifen schier gewar· [WS 1]
so heisset einer twer
der truͤbt die tage clar·
winter bringet her·
vns sorge vnd anderswar· [WS 2]
wunnen bar·
werdent dú lant so gar·
So sach man ǒch dike an schonen frowen·
wunnen mer danne man nu muge geschowen·
si bergent nu keln blank vnd nekelin·
vnd ir hǒbit· wîsse hende ǒch dike·
winter wendet vns suͤsser ǒgenblike·
man sach dur klein ermel blanker arme schin·
so sach man in wiblich
sten ir kleinen lin·
nv went sú sich
zihen in die stuben hin·
lichter schin·
wil leider túre sin·
Doch můs ich vor allen noͤten klagen·
dc mich lat min frowe iamer tragen·
si tůt glich wies min nit muge minne han·
swc ich darna trostes an si můte·
gan si mir nit heils dú reine gůte·
so ist gar verlorn dc ich mich an si lan·
nu enmag ichs nit·
wan si ist so wol gitan·
doch ensol si licht
den můt nit iemer han·
vf den wan·
dinge ich noch sender man·
Anmerkungen (Wikisource)
↑ Vorlage: ſo heiſſet ein̾ twer
d̾ truͤbt die tage clar·
darnach wirt man ſnewes vn̄ rifen ſchier gewar·
↑ Vorlage: vns ſoꝛge her·
vn̄ and̾ſwar·
Wan mag roͤlich schowen·
tage clar· vnd mange var·
anger vnde walt·
bistalt· sint wunnenklich·
berg vnd tal vnd ǒwen·
sint bekleit·
vnd heide breit·
vnd den plan·
sicht man ǒch wunnenrich·
nieman kan des sumers wunne volzellen·
schoͤn sint sin [WS 1] gisellen·
viol rosen blůmen kle·
bǒme blůt lǒb gras vnd gamandre·
Des habent verlâssen
herzen pin·
dú vogillin·
sumer tůt·
ir můt so rechte fro·
dar zů vf dien strâssen
froͤiden vil·
sich haben wil·
sumer nie·
verlie· er enfroͤite so·
man hoͤrt dike an tenzen hohe singen·
vnd dur bǒme erklingen·
suͤsseklich der vogelschal·
des tůt ir teil wol dú nachtegal·
Owe sendú swere
machet doch·
dc ich bin noch·
iamers vol·
swie wol· nu mangem ist·
min frowe seldenbere·
achtet nicht·
swie mir geschicht·
dauon mir·
von ir noch trostes brist·
owe si erkent nicht min senden smerzen·
dauon ir zeherzen·
nicht engat min arebeit·
owe das ir guͤte das vertreit·
Anmerkungen (Wikisource)
↑ Vorlage: ſint ſint.
Nv wil der sumer hinnen·
owe dast mir leit·
man sach in sinem grase dike schone frowen gan·
der winter bringit vns innen·
grôsser trurikeit·
vnd ǒch dike kleine vogel wilde das sir sang wen lan·
da bi ist er ǒch bi senden sorgen schade·
si weren an in doch vil zeswere·
ich můs iemer ligin vnder glúkes rade·
mirn helfe vf min frowe seldebere·
si ist gar wandels lere·
dauon bin ich ir·
owe wenne sol von ir genaden komen ir trost zemir·
Wer moͤchte mir gelǒben·
wie mir senden ist·
swenne ich si sihe so schon gebaren vnd so wol gestalt·
ir wunne macht mich tǒben·
das mir sinne brist·
vnd brinne ǒch in der minne vúre wilent wirde ich kalt·
also wandel ich mich da von rechter not·
wan mich iamert nach ir alse harte·
ir wengel vn ir munt sint so rosen rot·
da bi lachet si so rechte zarte·
si ist ǒch rechter arte·
ach wie ist si so gůt·
got hat ir truten stolzen lib vor arge gar behůt·
Enkein ding mag so gůt sin·
man vindet wol daran·
das man spreche en wer das so were es volkomen gar·
wan dú schone frowe min·
dú ist wandels erlan·
si ist kúsch mit worten vnd mit werken so ist si valsches bar·
est nit můtwille das mir nach ir ist so we·
mich erlat sin nicht dú starke minne·
ir kel vnd ir hende sint wis recht als der sne·
vnd stet so lieblich ir ir kinne·
uil wol stet ǒch ir tinne·
vnd ir ǒgen clar·
als ich si han gelobt· dc ist ane allen zwivel war·
Manig belangen·
ist ergangin·
nach der zit·
dú nv git
vns ǒgenwunne vil·
dauon wunder
wirt dar vnder·
lúte fro·
ich wer so·
wan das min frowe enwil·
wc frumt mich swie schoͤn es ist·
ob si wunnen·
mir nicht gunnen·
wil von ir·
so ist mir·
als dem gar wunnen brist·
Voglin singen·
ǒch gebringen
mir nit mag·
das der slag·
verheile den mir slůg·
in min herze·
sender smerze·
vf den grunt·
da mir kunt·
wart dc mir minne trůg·
an mine frowen minen můt·
wan dv́ reine·
wigt so kleine
min arebeit·
dauon leit
mir froͤide túre tůt·
Swenne ich schowe·
was min frowe·
wunnen hat·
ach wie gat·
dc dur dc herze min·
so zartliche·
minenkliche·
gebaret si·
secht da bi
hat si wunnenklichen schin·
si ist zewunsche wol gistalt·
so ist ir gemuͤte
rechter guͤte·
ǒch so vol·
wol ir wol·
ir wunne ist manigualt·
Froͤmdes minnen·
vnd angwinnen·
ist gelich·
des ǒch ich·
vil wol beuunden han
wan min sinne·
stent vf minne·
da ich můs·
froͤmden grůs·
vúr allen trost enpfan·
sus gez dien die minnent dar·
da vil hůte
wider ir můte
huͤten kan·
secht dar an·
verlierenz ir arbeit gar·
Dem gelinget·
licht der ringet·
vmb ein wib·
der sin lib·
sich mag gesellen zů·
wan sin sprechen·
mag ir brechen·
froͤmden sin·
der gewin·
ergêt im licht vil frů·
vor heinliche wart nie nicht·
si kan wenden·
sorge vnd enden·
froͤiden kraft·
sigehaft·
wirz gerne swa si geschicht·
ICh were gerne fro·
nv mags nit leider sin·
ich minne gar zeho
si wil nit růchen min·
dauon ich herzen sere·
vil stete haben můs·
mir wart ir nie nit mere·
wan froͤmdeklich ir grůs·
Owe si wigt so kleine·
min herzekliche not·
gnade ein suͤssú reine·
erwendent mir den tot·
irkennent mine swere·
vnd helfet mir inzit·
bin ich v́ lange vnmere·
der tot vf minem herzen lit·
ICh man v́ch rechter trúwen·
die ich doch gegen v́ han·
das ir v́ch lâssent rúwen·
wan ir noch hant getan·
gegen mir so froͤmdekliche·
das můs ich sere klagen·
gnade ein wunneriche·
lant mich noch heil an v́ beiagen·
Nv merkent mich swer noch tǒgen lige·
ir sunt irgeben der froͤiden spil·
dc rate ich v́ gar ane valschen můt·
er were vnwis der mir des verzige·
der tag nit mer irwinden wil·
der leit versicht dast vúr rúwe gůt·
frowe swas ich nv gisage·
went ir doch niender sprechen herre wach·
es wirt vnsˢ aller klage·
das vns so rechte leide nie bischach
nein frowe versehent e das vngemach·
Si horte das ich vs ernste rief·
si sprach nu wache miner froͤiden hort·
ich můs dich leider schiere von mir lan·
ir trêne vil vf im zerswief·
si sprach wachter dins sanges wort
dú hant den tag zefroͤide vns kunt getan·
er ist so gern bi mir·
vnd ich bi im· die wile ich iemer mag·
wacht dins sangis imbir·
vnz das ane zwiuel komen súl der tag·
wan nien kein wib so lieblich me gelag·
IR hant v́chs vnwêgsten nv bidacht·
der mâsse kan dú wendet leit·
dauon so lere ich v́ch die masse wol·
ich hab v́ch in vngemuͤte bracht·
doch hab ichs v́ dur gůt geseit·
dc ir v́ch scheident sit es tagen sol
er sprach frowe des ist zit·
swie we mir tůt das ich mich din enbar·
frowe din weinen mît·
dc dich got iemermere wol bewar·
vnd kv́sse mich e das ich von dir var·
Nach liebe gat leit·
ich můs ein wib erschreken·
sang ein wachter dú noch bi frúnde lit·
ir si giseit·
dis si in balde sol weken·
wan es wil tagen dauon ist es zit·
in not ich stan·
vbrig liebi vúrchte ich·
dc si sich dur liebi wâgen vnde mich·
wir můssen lan·
vnser leben vnd ere sún han·
vor tage dan gescheiden sich·
Si tet ims kunt·
frúntlich mit vmbeuange·
vnd ǒch mit manigem brústel druke do·
ir roter munt·
sprach frúnt du slafst zelange·
wir suln vns scheiden swies vns macht vnfro·
der herre gůt·
ir wekens da bepfant·
er sprach mir ist wol vnd ist mir leit erkant·
mir froͤit den můt·
din minnenkliches trúten so tůt·
mir we [377r] dc ich von dir můs zehant·
Gv̊t herre min·
es mag sich mer gefuͤgen
ob wir vns scheiden e mans werde gewar·
frowe das sol sin·
wir sun vns lan genuͤgen·
das wir die nacht waren froͤlich sament gar·
frowe vnz har nach·
so gib nv vrlob mir·
si sprach herze das gib ich noch kume dir·
wie ist dir sus gach·
da ist frowe vmb din ere· si sprach
nu uar wie kume ich din embir·
Wol der suͤssen wandelunge·
swas winter trůbte·
das tůt sumer clar·
das froͤit alte· das froͤit iunge·
wan sumer v̊bte
doch ie wunnen schar·
wol im swer sich nu froͤiwen sol·
dem ist so wunnenklichen wol·
swas aber ich von wunnen schowe·
doch wil min frowe·
dc ich kumber dol·
Owe solt ich vnd min frowe
vnsich vereinen·
vnd vns danne ergên·
in ein schonen wilden owen
dc ich die reinen·
sehe in blůmen sten·
da sungen vns dú vogellin·
wa mechte mir danne bas gesin·
so vunde ich da schon gerête·
von sumer wête·
zeinem bette fin·
Das wolde ich von blůmen machen·
von vol wunder·
vnd von camandre·
dc es von wunnen moͤchte lachen·
da muͤsten vnder
múnzen vnde kle·
die wanger muͤsten sin von blůt·
das culter von bendichten gůt·
dú linlachen clar von rosen·
es were ir losen·
libe nicht vorbehůt·
Wer si nicht so lobeliche·
si wer zedanke
an das bette mir·
si ist so rein so wunnenriche·
dauon nit krankú
wunne horte zir·
so spreche ich lieb nu sich wie vil·
das bette hat der wunnenspil·
darvf ge mit [WS 1] mir vil here·
ich vúrchte sere·
das si sprêche inwil·
Wan das mir ir zorn we tete·
ich wurde ane lǒgen·
da gewaltig ir
swes ich si lieblich irbête·
das brechte tǒgen·
hohe froͤide mir·
e das aber ich si wolde lan·
ich wolde si doch vmbevan·
vnd si dan· ans bette swingen·
owe das ringen·
mag mir wol vorgan·
Anmerkungen (Wikisource)
↑ Vorlage: mit mit.
Es ist doch rechte klagelich·
das nu der sumer schoͤne·
von hinnan sol·
er was so manger wunnenrich·
des horte man vogil doͤne·
klingen so wol·
nv sicht man truͤbe tage·
das truͤbe můt·
doch ist min meistú klage·
das mir nicht tůt·
genaden kunt· min frowe gůt·
si hat ir trost so lange· vor mir behůt·
Doch ich mich nit irwerren kan·
mir muͤsse dik· ir guͤte
zeherzen gen·
swenne ich si sich so wolgetan·
so mag dan min gemuͤte·
nit stille sten·
wan es wirt dan so wilde·
so mir wirt kunt·
wie zartlich stet ir bilde·
so wirde ich· von minnen dur des herzen grunt·
vnd ǒch von sendem iamer lieblich enzunt·
Nv hoͤte er sich swer sehe dar·
vnd rechte kan geschowen·
das schone wib·
wan er wirt in der sele giwar·
der wunnen miner frowen·
so kumt sin lib·
in so manigualten sinne·
vnd ǒch in ger·
nach minnenklicher minne·
so kumt danne er in sende not· des bin ich wer·
swer sich des mag· er lassen ia růwet der·
Nv stet so wol gebluͤmet·
dú heide in sumerlicher wat·
des man vil von wunnen sicht·
des wirt si wol geruͤmet·
von dem swer sich wol wunne entstat·
doch ist si volgestet nit
e das da mer geschicht·
dc man ǒch frowen sicht·
da gan losliche·
so ist si dan gastunge riche·
das man ir volles lobes gicht·
Swa manig wiblich bilde
ze semne get· vil wol bekleit·
da ist der welte wunne vil·
wie wirt da dan so wilde·
des mannes herzen in suͤssekeit·
der darnach gedenken wil·
wan sins herzen spil·
kumt danne vf das zil·
der suͤssen minne·
des bin ich worden inne·
es ist so gůt das ichs nit hil·
Doch git es im ǒch kumber·
swer verrer dan gedenket da·
dan im iemer werden mag·
des bin ǒch ich vil tumber·
wan es gischicht mir dan iesa·
das ist minner froͤiden slag·
des mir nacht vnd tag·
leit vúr froͤide ie wag·
doch sunderliche
bin ich gedanken riche·
nach ir der ich mit dienste ie pflag·
Owe voglin doͤne·
owe manger schoͤne·
die vil schone wib·
dike ê giengen [377v] schowen·
vf heide vnd in owen·
manig zarter lib·
in lichtem kleide·
loslich dur dc gras·
ir schoͤne vnd der heide
lúchtent· zemene bas beide·
was da wunnen was·
Des wart da von inne·
froͤit vnd wilder sinne·
manig iunger man·
die mit mangem blike·
moͤchtent sehen dike·
frowe vf den plan·
ia was das húre·
des mag nu nit sin·
winter bringet sin stúre·
des sint froͤide túre·
vns vnd vogelsin·
JA klage ich noch mere·
dc min frowe here·
nie gewag min not·
vnd ich doch so harte·
ir genaden warte·
bis vf minen tot·
vnd neme dú schone·
mir noch sende arbeit·
so wurde mit ir lone·
edeles heiles krone·
vf min hǒbt bereit·
WAs meinent nu dú vogellin·
das si so dike vf sehent gegen dem sunnen·
vnd ǒch da mitte singent ho·
si froͤt der sumerliche schin·
das sich dú welt nu stellet gar zewunnen·
des sol man mit in wesen fro·
nu stet min herze leider so·
das ich enmag·
min frowe dú ist min sumertag·
dú wundet mich·
also das ich·
vil kume mag genesen·
Wie sin wir in so suͤsser zit·
dú heide vnd owe sint so rechte schoͤne·
das swendet manges herzen pin·
wan vogelin singent widerstrit·
so manigualde suͤssekliche doͤne·
doch můs echt ich in klage· sin·
mir tůt so we dú frowe min·
das můs ich doch·
bi mangen wunnen klagen noch·
es ist gewert·
so manig vert·
das ichs vnsanfte trage·
Swie si mir tůt doch minne ich si·
mit ganzen trúwen das ist gar ein wunder·
ich můs ir dienen iemer me·
si dunket mich doch arges fri·
swie sich mich tůt an allen froͤiden vnder·
mir ist nach ir senliche we·
ich slafe ich wache· ich ste·
doch ist min můt·
bi ir wan si ist so rechte gůt·
des wúnsche ich mir·
das ich von ir·
noch werde froͤidenriche·
Nv warte ich alles wanne si·
sich welle neigen gegen mir senden manne·
owe des wer so verre zit·
wan ich were ir so gerne bi·
si solte mich doch meinen etteswanne [WS 1]·
min trost an ir genaden· lit·
ir froͤmde mir vil leides git·
ach reinú frucht·
dur din vil wiblich stenden zucht·
erbarme dich·
noch vber mich·
hilf mir von sendem schaden·
Swie verre ich von der schonen var·
ich habe ein botten der vert alse drate·
der vert zůzir in einer stunt·
den sende ich alle morgen dar
zůzir vnd ǒch vils mangen abint spate·
der botte ist nicht der heren kvnt·
wan er get von mins herzen grunt·
es ist min sin·
der vert zůzir· swie verre ich bin·
si selig wib·
ach moͤchte min lib·
als ofte zůzir keren·
Anmerkungen (Wikisource)
↑ Vorlage: etteſwēne.
Manig hoher můt·
der tůt sich aber vnder·
das vuͤgt des winters zit·
wan sin getwang·
tůt krank· von schoͤne wunder·
vnd ǒch der voglin strit·
dú so sůs schoͤne
lobt mit gidoͤne·
wer klegte nicht·
dc man ensicht·
noch hoͤret· das vns e machete fro·
Doch můs der pin·
mir sin· vor allem smerzen·
der mir senlich tůt we·
wan si noch nie·
verlie· min klage ze herzen·
was solte ich klagen me·
vnd doch ir min trúwe·
waren ie so núwe·
da von tůt mir so we·
von ir froͤmden owe
... lies si das noch·
Dv́ minne kan·
nit han· die rechten mâsse·
dc ist mir leider kunt·
wan si mich treit·
in leit· die strengen strâsse·
vf senelichen grunt·
ein wib schoͤne vnd here·
liebt si mir so sere·
vnd nicht ir mich·
da uon si sich
mir froͤmdet· ach mich twinget ǒch ir lib·
Nv haben wir gewechselt wol·
wir haben leit gegebin
vmb hohen můt·
vns te e· winter sorgen vol·
nu mag man froͤlich· leben
den sumer gůt·
man sicht so mange schoͤne·
so hoͤret man
der voglin suͤssen doͤne·
ach solte ich gan
mit minem liebe wolgetan·
an ein heinliche gruͤne ...
So breche ich lǒb gras viol kle·
ich wolte ein bette machen·
von schoner var·
die wanger stolz von camandre·
dc cult manger sachen·
von blůmen schar·
so spreche ich lieb nu schowe·
das bette fin·
vil minnenklichú [378r] frowe·
nu růche
dc mir zerge senlicher pin·
ich vúrchte das si spreche des mag nicht sin·
Doch wolte ich vmbeuahen si·
wer wolte mich des wenden
da wêr nieman
so wurde ich lichte sorgen fri·
sin moͤchte mit linden henden
min nicht erslan·
wir muͤstin lichte ringen·
so solte ich wol
hin an dc bette si swingen·
so wurde es vol
der wunnen der ich wúnschen sol·
wan ich ir stêtes froͤmde so kume dol·
JA klage ich die sumerzit·
winter git·
sorgen vil·
der wil des nv nit lan·
er nimt vns so lichten schin·
voglin
suͤsser schal·
vber al· des můs zergan·
ich klage noch me·
man sach frowen loslich gan·
vf den plan·
des nu nit geschicht· das tůt vns we·
FRowen wunne liebt sich bas·
danne alles dc
ieman sicht·
des gicht· doch manig man·
ir zartlich gebaren·
tůt mannes můt·
froͤiden vol·
der wol kan wunne entstan·
es tůt ǒch we·
dem den sende not geuat·
wan du lat
kume den man· des si swie es erge·
ER mag sich erwêren nicht·
der ansicht·
ein zart wib·
sin lib danne in not·
ob si schoͤn ist· wol gestalt·
manigualt·
wirt sin ger·
swenne er sicht ir munt rot·
ich weis bi mir
swa ich min frowen ie gisach·
ich dachte ach·
wan solte ich· noch mich kunden zů dir·
Swem ze můte·
nach dem gůte·
si der erne loͤne·
der bereite sich des ist zit·
wol vf knechte
vnd ǒch rechte·
stolze dirne schoͤne·
loͤne gůte man v́ da git·
dar kumt manig schoͤnú schar·
wol im wol im wol swes lieb kunt dar·
wan er dike·
minnezike·
mag im da irzeigen· secht das tůt in sorgen bar·
IN der erne
pfligt man gerne·
froͤide vnd wilder sinne·
wan da hůte ist nit zeuil·
da wirt kosen·
mit vil losen·
sprúchen von der minne·
dar zů manger wunnen spil·
we wie ist erne rechet so gůt·
wan so wol gesellen tůt
knappen klůge·
wol mit fůge·
zů dien dirnen schoͤne· dc froͤit vúr des meijen blůt·
Moͤcht ich kunden·
manger stunden·
mich zů miner frowen·
das tet mir ǒch sorgen bůs·
merker huͤten·
kan so wuͤten·
so ich si wolte schowen·
das ichs dike miden můs·
swie min wunne lit an ir·
vnd ich so kûme verbir·
min gelúke·
manger stúke·
iemer also bitet ald sin bringens zemen mir·
Herbest wol ergezzen kan·
gisindes man
der sumerzit·
swer miete git
der ist so wert·
er git hamman bi der glůt·
vnd gůt·
vnd brâten veis·
vnd wúrste heis·
swie vil man gert·
des werdent da die knappen geil·
einer sprichet súde vnd brat·
des herbstes rat·
vil lieber wirt·
sit er ivns birt
so vollen teil·
INgwant blezze terme vnd die·
das vns der hie
nit abege·
noch gib vns me·
des ist vns not·
so der hauen rates vol·
er wallet wol·
so gib vns her
nach vnser ger
recht einlif brot·
dar vs begús vns dú so gar·
klobewúrste· vnd núwen win·
dage ǒch har in·
der ist so gůt·
der herbest tůt
vns sorgen bar·
Doch was mangem minner bas·
do sumer was·
sit man nu nicht·
der wunnen sicht· die man sach do·
do man sach die blůmen sten·
vnd frowen gen
so sumerlich·
...
hende wis ir neke clar·
sach man ǒch bar·
der lichte schin·
můs túre sin·
den winter lang·
Wan es bergent schonú wib·
ir zarten lib·
an húten lint·
der kalte wint·
tůt dike we·
hingeleit· sin lîn so klein·
da wîssú bein·
so luchten dúr·
ich hans der vúr·
wis als der sne·
vnd dur klein ermel· arme wis·
vns nemet· ir winterkleit·
die suͤssekeit·
ach sumerzit·
wie wuͤste nu lit
din hoher pris·
Also lit mins herzen grunt·
sit mir wart kunt·
min frowe gůt·
wan si mich tůt·
in sorgen slag·
vnd si mich gitrôste nie·
swie we mir ie·
nach ir gischach·
dc vngemach·
si nie gewag·
ich moͤchte wol erbarmen si·
ich han sender not so vil
dc dú mich will
verderben doch·
sin tuͤie danne noch
der not mich fri·
Dv́ minne brichet dike ir recht ir guͤte·
si lat ir rechten dienestman·
vnd bringet da bi mangem hochgemuͤte·
der ir doch nicht gedienen [378v] kan·
dauon ist si so wunderlich·
si hilfet so gar vngelich·
sin růchet war si keret sich·
Si solte dem helfen der hoflich kan werben·
vnd frowen ist mit trúwen holt·
sin solte stoltzen man nicht lan verderben·
so teilte si hoflich ir solt·
nv hilfet si mangem der nit kan·
wan sin ein vngesalzen man·
des sint ir doch die besten gran·
Wan tůt si rechte dú verwâssen minne·
vnd tůt ir namen doch gelich·
ich wene si hab niender rechte sinne·
wan si so dike swechet sich·
wan si so mangen twinget dar
da man in tůt so froͤiden bar·
in wirt ir helfe ǒch nicht gewar·
Es můs ein man·
dik han· so senden smerzen·
der frowen gern nimet· war·
ir lichter schin·
so fin· get im zeherzen·
vnd durch die sele gar·
ein wiblich zartes bilde·
git manne můt·
vnd tůt· sin herze wilde·
wib sint ein lieblich gůt·
Dvr schonú wib·
mans lib· sol pflegen zúchte·
vnd ǒch bescheidenheit·
wer tet des nicht·
man sicht· so stolzer frúchte·
nicht in der welte breit·
wib sint in mannes ǒgen·
ein suͤsser schin·
ach min· des tulde ich tǒgen·
von suͤsse strengen pin·
NAcht vnde tag·
er mag· wol froͤlich wesin·
der mag bi frowen sin·
vor leit er sol·
vil wol· bi in genesen·
sin zit get sůsse hin·
sin ǒgen sehint dike·
so lieblich dar·
doch gar· heinlicher blike·
wib sint so zartlich clar·
IN dem gruͤnen kle
sach ich min frowen gan·
ach was ich da wunnen sach·
an ir vil vnd me·
vnd an dem schonen plan·
das es in min herze brach·
blůmen clar· vnd dv́ frowe min
luchten gegen ein andern dc dú wunne vf gie·
in gesach nie·
so lichten schin·
Ich bin nach ir so
gar senelich verdacht·
sin helfe mir es ist min tot·
we wes wart ich fro
dc ich dar zů wart bracht·
do mir dú minne dar gebot·
don wisse echt ich des rechten smerzen niet·
in wande nicht in vunde schier genade an ir·
wan minne mir·
so suͤsse dar riet·
Hilf mir frowe gůt·
dur dine selikeit·
das ich nicht verderbe so·
sich din froͤmden tůt
mir dise sweren leit·
owe mache mich noch fro
frowe gůt· aller dinge gar
wan das du mir stetekliche bist gehas·
vnd lâst du das
so ist es war·
Swer wol kunne·
frowen wunne·
manigualt enzstan
der sol sehen·
gern vnd spehen·
an ir loslich gan·
vnd nigen ir zarten grůsse· vnd nemen war·
das man schowen
mag an frowen
lieblich wunne gar·
Doch swen minne·
bringet inne·
wie si twingen mag·
dem tůnt dike
suͤsse blike·
kunt vil senden slag·
swenne er sicht so schone frowen· so wiblich gůt·
frowen bilde·
machet wilde·
dike mannes můt·
Swa min ǒgen·
sehent tǒgen·
min lieb wolgitan·
sender smerze
kan min herze·
danne wol durch gan·
so súftet es ie dar vnder· vnd klagt mir
das dú reine·
wigt so kleine·
swie mir ist nach ir·
Swer sich kunden·
manger stunden·
mag der frowen sin·
in dien dingen·
mag gelingen·
im wol werden schin·
swer froͤmde da danne můs wesen· dar sin můt treit·
secht des werben·
můs verderben·
gar in arebeit
Selken kumber
trage ich tumber·
nv vil mange zit·
dest min můten·
gegen der gůten·
ǒch so wuͤste lit·
so froͤmdet sich mir dú here· noch leider ie in mocht klagin·
noch gesagen·
ir min iamer me·
Si ist so lieblich wol gestellet
vnd ǒch so schone
da bi minnenklich·
des si mir so wol geuellet·
ir zucht ich kroͤne
si ist ǒch sinnen rich·
ir stet ir gan ir gruͤssen wol·
si ist houeliche vnd tugenden vol·
ir stet zartlche so si lachet·
ir wunne machet·
dc ich kumber dol·
Owe das ich han beuunden·
das si mir armen
nicht ir hulde gan·
si lat mit senlichen wunden·
si moͤche erbarmen
das ichs von ir han·
vnd ich durch trúwe dulde das·
so muͤsse mir niemer werden bas·
liesse si mich in iamer iemer·
in moͤchte ir niemer
werde doch gehas·
[379r] Das si so lieblich gebaret
gegen· alr der welte
wan engegen mir·
ich weis wol das si des vâret·
wes ich engelte
das ist kunt wol ir·
mich dunket ǒch war vmb es si
das ich ir wer so gerne bi·
des lat si mich ane ir hulde·
vnd doch der schulde·
wirde ich niemer fri·
Alle die wile si mich midet·
so kan ich niemer
werden rechte fro·
des min herze iamer lidet·
vil leider· iemer
vnz es stet also·
doch troͤstet mich ein lieber wan·
das es ezwenne moͤcht anders gan·
dc ich si noch moͤchte irbarmen·
das si mich armen
nit enwolte lan·
Swas der man so gerne het·
des wúnschst er wunder·
also wúnsche ǒch ich·
got lâsse alle ir ere stête·
vnd doch darvnder
das si troͤste mich
e der tot werde von ir schin·
sin troͤste mich· so můs das sin·
der beider neme si das eine·
so sol dú reine·
doch nicht lassen min·
Der ich leider·
dise nacht gehuͤtet han·
der vmbeuan·
ist beider noch so manigualt·
wan ir beider
wille stellet sich inein·
ir sorge ist klein·
si sint so minnenbalt·
wan sorgent si wie es vns irge·
wirt man sin gewar· so komen wir in not·
nv welle got·
das si sich scheiden e·
Es biginnet
gegen dem tage stellen sich·
alsus warne ich·
si beidú der ich pflag·
des gewinnet
doch min frowe leides vil·
dauon sin wil·
nicht wissen noch den tag·
min herre sehe selb dar zů·
es stet beiden vmb ir lib ich kum wol hin·
wan ich wil sin
vs vor dem morgen frů·
ICh sleich tǒgen
vs vnd sang ein warnen do·
do sprach ie so·
minnenklich·
ane lôgen·
der wachter hat vns verlan·
dú solt vfstan·
min herre tugendenrich
ich weis nv wol das es ist zit·
des sich vnser lieblich trúten scheiden sol·
es kumt nicht wol
swer doch zesange lit·
Sich [WS 1] froͤit vf die edlen nacht·
ein gislacht·
minnere harte·
des sin frowe růchen wil·
so der tag sin liecht verlat·
secht so gat
si an die warte·
als si hant gileit ir zil·
so kvmt er gegangen tǒgenlichen
vnd růrt das tor so lise iesa·
so si das erhoͤrt dú minnenkliche·
so spricht si min herre bist du da·
er sprichet edlú frowe ia·
tů mir vf vil wunnenriche·
das ich dich al vmbeua·
IM wont wilde froͤide bi·
swanne si
dc tor enzslú̂sset·
vnd das hoͤrt der werde man·
vnd si engegen im danne· vf tůt·
dast ein gůt·
des nicht verdrú̂sset·
beider lib so lobesan·
si vuͤrt in mit ir so wîssen hende·
vúr ir bette· dur der hůte bant
also stille das echt nieman wende·
wie schier si sich danne enkleidet hant·
si gent zemene lieb bewant·
wirt da wol mit liebem ende·
in wirt beiden minne irkant·
Wer moͤchte besser froͤide han·
des enkan·
ich nicht volspehen·
als si hant die nacht so gar·
da wirt manig vmbeuang·
lieblich lang·
da mag geschehen
manig kus so valsches bar·
da wirt brust an bͮst· so wol gedruket·
das da sorgen mag beliben nicht·
beider lib zesemene nach gesmuket·
dauon da· das liebste lieb geschicht·
doch hat si die zůuersicht·
dc in froͤide wirt verzuket·
so der wachter tages gicht·
Anmerkungen (Wikisource)
↑ Vorlage: Sicht.
Swem sin můt·
stet vf minne gar·
vnd der getar·
dik frowen gůt·
den můt· getůn wol bi·
vnd si· dc wol enpfahent·
dem nahint·
suͤssú heil·
des wirt sin můt· so geil·
so wol tůt·
im swanne er dar kvmt·
ob es in frumt·
doch anders nicht·
wan gesicht· an schone wib·
sin lib· froͤt sich ir wunnen·
die kunnen·
geben heil·
vnd froͤiden vollen teil·
Ich wene das·
keiner slachte gůt·
so suͤsse ge dvrch mannes můt·
so dik sam frowen klar·
so gar· suͤsse ist schoͤne·
dauon kroͤne· wol·
die frowen tugende vol·
es tůt bas·
herzen ǒgen nicht·
swie vil man weltlich wunnen sicht·
sam frowen wolgitan·
das kan nieman verkeren·
wan si hant eren· hort·
dvr die welt hie vnd dort·
Es wart nie suͤsˢ angesicht·
noch liebers nicht·
danne schonú wib·
mannes lib· wirt des gewar·
der dar· von herzen achtet·
vnd trachtet·
voͤlleklich·
an wib [379v] so wunnerich·
des tůt ie wunderer sorgen bůs·
ir zartlich grůs·
doch mangem man·
der kan· recht wunne intstan·
vnd gen· in dike vnder ǒgen·
vnd tǒgen·
inren sich·
ir wunnen minnenklich
Der slaf nicht mannes herzen kan·
binemen frowen wolgitan·
sin gidanke sin in bi·
als si schon vor im wesen·
das v̂sîrlesen
gůt· dike hoͤhet mannes můt·
swel man sicht· frowen minnenklich
der mag des wol erkomen sich·
in sines herzen grunt·
der stunt· mag er wol sehen·
das man in iehen·
sol· gar hohes lob so wol·
Dú welt hat nicht das si·
so minnenklich·
vnd ǒch da bi·
so tugenden rich·
sam frowen gůt·
Das dur gat· manigen man·
dc herze sin·
der kan entstan·
loblichen schin·
der sanfte tůt·
Swa man der welte pris wil began·
da můs man schone frowen han·
da enist hof anders nicht·
vnd sicht· man da schone frowen
... wol·
den hof vil êren vol·
Ich bin wer· das manig werder man·
so gerne sicht· frowen froͤde han·
des maniger dar danne gat·
vn hat· mit in vil wunnen·
wan frowen kunnen· so·
gar hoflich wesen fro·
So stet loslich ir gan·
vnd so zartlich ir grůs·
das tůt· dike senden man·
vil der swere bůs·
der des nimt war·
froͤide gros· birt ir zucht·
dú ist so wiblich gůt·
in gesach nie stolzer frucht·
das seit mir min můt·
noch so lieblich geuar·
Wib sint der welte ein gastunge bas·
vnd ein geuerde danne alles das·
got hat der welte verlan·
manig mân· můs mir des iehen·
der rechte spehen kan·
wib sint so lobesan·
mich dunket swer· frowen gern nimt war·
das der deste houelicher var·
das er geualle in wol·
das sol· nit sin vnuůge·
ia suln wir klůge· sin·
dur schone frowen fin·
Swanne dú zartlichen wib·
hant so loslich ir lib·
die so wol sint gestalt·
ach wie manigualt·
si wunne hant·
We was wart· schoner ie·
das wart mir kunt noch nie·
beide wengel ir mvnt·
sin von roͤti angezunt
dur ellú lant·
Vns mag der lichten blůmen schin·
noch suͤsser sang der vogellin·
noch sumerliche blůt·
so gůt· gedunken niemer·
den můt wir iemer· han·
sam frowen wol gitan·
Hin vnd her nemen wunnen war·
vnd sůchen durch dú lant· So gar·
nach der welte· wunne hort·
nu dort· vnd hie wir schowen·
an schonen frowen· doch
die hochsten wunne noch·
Suͤsseklich·
sint ir wort·
vnd ir singin da bi·
wib sint wunnen ein hort·
dc er vil selig si·
swer in lob git·
Seldenrich·
ist ir můt
so stent ir sitte wol·
wib sint lobeliche gůt·
des man si loben sol·
vúrs meien zit·
Es wirt von nichte mannes můt·
so rechte minnenkliche gůt·
sam dur die frowen [WS 1] clar·
so gar· vil hant si guͤte·
dc got ir huͤte· so·
das si dike wesen fro·
Swer wol gewon· schon frowen si·
dc er in dik mag wesen bi·
mit fůge wol im wol·
der sol· fro sin von schulden·
ob er nach hulden kan·
gesin ir dienestman·
Anmerkungen (Wikisource)
↑ Vorlage: frewen.
Nieman vol
loben frowen kan·
wan si
bi· tugenden wonent alse schone·
selden krone·
sint ir ingesinde·
wol· in wol·
iemer des wúnsch ich·
mich· sol
wol· des můt zihen in gemuͤte·
dik ir guͤte·
ich so wol beuinde·
Ein schones wib·
ein wiblich lib·
dú suͤsse guͤte·
mang gemuͤte·
so sůs durgat· so·
dc er fro·
můs sin der wunnen·
die dem lichten sunnen·
gelichent sich·
wib sint so manger wunnen rich·
ia were es wol·
das liebes vol·
wer sin gemuͤte·
der ir guͤte
mit lobe dike tůt·
lieblich gůt·
ia wol dien frowen·
wan mag an in schowen·
so suͤssen schin·
wan mag bi in wol froͤlich sin·
So stent schone
ir tinne·
ir hǒbt kelen nak· ir kinne·
ir brústel ir ǒgen· des man sol·
wol· dar·
war· gerne nehmen
Der welte krone·
sint frowen·
gar suͤsse ist ir anschowen·
ir ist vil so rein manig frowe gůt·
tůt· das
swas· wol mag zemen·
Vnd wer es nicht·
ein zůuersicht·
doch sendes smerzen·
mannes herzen·
swanne er sicht so gar·
wunne var·
die schonen frowen·
doch git im das schowen·
hohen můt·
swie we doch sendes iamer tůt·
Sit mannes můt·
wirt so gar gůt·
swanne er mag schowen·
schone frowen·
so wurde er erst fro·
keme es so·
dc er ezliche·
wiblich [380r] wunnenriche·
solte vmbeuan·
so moͤchte er erst rechte froͤide han·
Si hant los· gebaren·
die reinen frowen claren·
gar lieblich stet ir kosen· da von wol wir·
ir· noch mugin vns froͤiwen von schulden sere·
wen· verdros ie frowen·
der si rechte konde geschowen·
der wart nie sicherliche des dunket mich·
ich· kan· an· in wol wissen so gar hoch ere·
Wie moͤchte ein man·
iemer verlan·
im kême zesinne·
rechte minne·
bi frowen so fin·
lichter schin·
durgat sin ǒgen·
da so lieblich tǒgen·
so kvnt er
in froͤde· vnd doch in sende ger·
Es ist klein· nicht·
das gůt man sicht·
an schonen wiben·
es kan triben·
leit wol von dem man·
der wol kan·
inzstan ir guͤte·
so wirt sin gimuͤte
froͤiden rich·
wib sint zerechte minnenklich·
Ir minnenklich· lachen· wunne san·
kan· doch·
noch· mangen wilden·
můt· vnd sinne·
da bi minne·
sinem herzen bringen·
Ir wiblich hende zartlich· wis·
pris· ich·
gich wiblichen bilden·
manig gimuͤte·
nach ir guͤte·
můs von schulden ringen·
Swenne ein schoͤn wib·
ir schonen lib·
so schone treit·
vnd wol bekleit·
so kumt si danne so gar·
lieblich clar·
so wol ze prise·
als vs dem paradýse·
kom ir lib·
ach wie sint so gůt schoͤnú wib·
der wibe loͤn· sint
suͤsse· vnd linde·
swer der beuindet·
der erwindet
an ir dienste nicht·
swiem geschicht·
er muͤsse danne sterben·
wan mag gerne werben·
vmb dú wib·
si hant so minnenklichen lib·
Ir wiblich tanzen mannes můt·
tůt· so fro·
doch gar seneliche· der recht achtet·
vnde trachtet·
wie loslich sis kunnen·
minnenklich stent in wiblich kleit·
breit· so wol
man ir wunne machin· mannes ǒgen·
werdent tǒgen·
lieblich vol ir wunnen·
Ja mag der han·
so lieben wan·
der dik mag schowen·
schone frowen·
wan er wirt dik so·
lieblich fro·
wan frowen wunne·
lúchtet sam der sunne·
mannes lib·
froͤit nit so wol so schonú wib·
secht doch swer· vil·
gedenken wil·
nach frowen bilde·
der wirt wilde·
wan er sicht· wol noch·
wunne doch·
an schonen wiben·
das wirs iemer triben·
frowen fin·
muͤssen vor allen wunnen sin·
ICh klage noch·
min alten smerzen·
der mir hie zeherzen·
lit den mir tůt dú here·
mere danne ich muge tragin·
min můt doch·
si nicht mag miden·
swie si mich nu liden·
lat nach ir sendes amer
iamer· můs ich von ir klagen·
Wafen min·
frowe ist so minnenklich·
vnd houelich·
vnd eren rich·
da uon bin ich·
so sere wunt·
in mines senden herzen grunt·
si mag sin·
wol an allen dingen gůt
arges behůt·
ir wunne tůt·
mich hochgemůt·
swie we doch mir
so stetenklichen ist nach ir·
Ach lieblich·
wib zartú frowe·
swenne ich schowe·
dich so wirde ich vil wunnen inne·
minne· vat mich danne in sendem strike·
des ir súfte ich also dike
nach dir minnenkliche·
nicht lach mich·
nach dir verderben·
wan min werben·
nach ir ist alles valsches eine·
reine· lach dich noch min not erbarmen·
troͤste mich vil senden armen·
frowe wunnenriche·
Swanne ich si·
sich so rechte wolgetan·
vil lieben wan·
ich danne han·
ich sender man·
ich wird so vol·
ir wunnen dc tůt mir so wol·
swanne ich bi·
froͤiden von gidanken bin
von ir so fin·
der frowen min·
so můs ich sin·
doch ǒch in not·
mich iamert nach ir munde rot·
In kunde min·
herze nie geleren·
keren· sich von ir· swie mir
ir· trost nicht sich endet·
wendet· si des nicht dú gůte·
doch der pin·
mir ist zeswere·
were· si mir nicht gihas·
das· were min froͤde iemer
niemer wurde mir we ze můte·
Swenne ich ir
wúnsche kum ich si verbir·
doch tůt dan mir·
so wol gegen ir·
dú suͤsse gir·
des wúnsche ich so·
das ich von ir· noch werde fro·
ach sol mir·
ir trost iemer werden schin·
ach frowe fin·
noch růche min·
in not ich bin·
vnd lach mich doch·
beuinden dines trostes noch·
Des were doch·
wol in dem zite· sol
mir von ir werden bas·
das· es schier geschehe·
sehe· si min herze wie das wuͤtet·
vnd in sendem iamer bluͤtet·
si moͤcht das erbarmen
owe noch·
tů· mir gnade zů·
dir lach mich tǒgen gen·
sten· vúr dich· mich· klagen·
sagen· dir von minem senden smerzen·
wie du [380v] bist in minem herzen·
so hilfst du mir armen·
Swie si mir· tůt min sin ist ir doch bi·
wan ich weis si·
gar arges fri·
ein meien zwi·
in bluͤte clar·
es treit nicht gegen ir wunnen dar·
mir git ir froͤmden grosser sorgen zol·
iamer dol·
das leit si wol·
vertriben sol·
ich bin ir knecht·
dauon hat si dar zů gůt recht·
Der vil edle Reginsberger was vor ir·
vnd bat si mir
genedig sin·
vnd dc si ze mir sprech got gruͤsse min diener·
das das sin ger·
des herren min·
si sprach zartlich zwar herre das můs ergan·
vnd lobte ims mit ir wîssen hende in sin hant·
min leit verswant·
dos mir fúr kan·
DA waren edle frowen edle herren bi·
der stunt do si
gelobte das·
ich wand ... das sis stete liesse·
wans vor in bischach
von eschibach·
der herre da was·
vnd der von Trosberg· der von Tellinkon·
ich wand dc mir solte ir trost da werden schin·
swie ich des bin·
von ir vngewon·
Svst besante der werde Reginsberger mich·
mit im gieng ich·
dar vf der trost·
ich wande das ich leides fri da wurde iesa·
do wart ich da·
froͤiden erlost·
si slos sich in ein stuben der gischicht·
er bat si vnd edil frowen edil man·
vil har vs gan·
do half es nicht·
Si suns ir nicht wîssen si ist vnschuldig gar·
ich brachte es dar·
da vůgte dc·
das was min ungelúke das ich han gegen ir·
das vůgte mir·
ir strengen has·
swas mich ir hulden irre dc muͤsse zergan·
es tuͤie danne ir lib in sol ir [WS 1] flůchen nicht·
swas mir geschicht·
heil muͤsse si han·
Owe das si mir nicht froͤiden gunde vor ir·
we tet doch mir·
so we der pin
das si vor mir barg ir lib so minnenklich·
ach si lie mich
in iamer sin·
sin wolte har us nicht e ich dannan kan·
sust vůgte es sich dc ich ir da nit gesach·
dc leit geschach·
mir senden man·
ICh irgieng mich vor der stat doch ane var·
do gidachte ich gar·
lieblich an si·
sazehant irsach ich verre ir schonen lib·
da schone wib·
ir sâssen bi·
do engonde si mir froͤiden nicht vor ir·
si gieng dannan do si sach das ich gieng dar·
das nimt noch gar·
vil froͤiden mir·
Liebú mere seit doch ein gůt ritter mir·
das lieblich ir
mvnt· von mir sprach·
si sprach wa ist min geselle dc was minnenklich·
ich froͤiwe mich·
das ie geschach·
das si vs mir gerůchte reden so·
dc schat ir vil kleinen vnd hilfet mich wol·
si ist tugende vol·
des bin ich fro·
ICh kam ir ze wege da si gar eine gie·
do gisprach ich nie·
kein wort zůzir·
ich irschrak· von minnen in mochte hin noch dan·
ich sachs echt an·
da wart doch mir·
si gieng ǒch vúr dc si nit grůste mich·
dc verzagte mich ǒch des ich· nit ensprach·
vnd do ich si sach
so minnenklich·
Minne sûmet an mir vaste ir trúwen sich·
si twinget mich
minnen so ho·
wan si nie min frowen gegen ir [WS 2] gitwang·
si habe vndank·
wie tůt si so·
was habe ich ir getan· si swechet sich·
twunge si gegen mir ir lib so tugende vol
so tete si wol·
wes zihet si mich·
Das dú minne mich so sere bitwungen hat·
vnd das si lat·
ir lib so fri·
dauon weis ich· das si hat verraten mich·
sin kere sich·
danne ǒch an si·
vnd twinge si min noch genade han·
owe minne wild das tůn so tůs in zit·
wan sender strit
wil mich erslan·
Frowe min ich man der rechten trúwen dich·
wan die han ich·
recht gegen dir·
dc du mir des gunnest das ich zů dir ge·
da nieman me·
si wan echt wir·
an argen list můte ich des frowe dir·
in wolt nicht wan klagen dir min sendes leit·
ach seligheit·
des gunne mir·
Anmerkungen (Wikisource)
↑ Vorlage: in.
↑ Vorlage: mir.